کراچی(این این آئی)میئرکراچی وچیئرمین سندھ سالڈ ویسٹ مینجمنٹ بورڈبیرسٹر مرتضی وہاب کی ہدایت پر تمام جلوس کے راستوں اور سڑکوں کو عرق گلاب کے پانی سے دھویا گیا تاکہ مقدس مہینے اورعید میلاد النبی کے دن فضا معطر رہے۔

جبکہ منیجنگ ڈائریکٹر سید امتیازعلی شاہ نے مختلف علاقوں کا دورہ کیا اور انتظامات کا جائزہ لیا۔دیگر تفصیلات میں 12 ربیع الاول کے موقع پرجلوس گزرنے کے اہم راستے نشترروڈ، بولٹن مارکیٹ، گروومندر، ایم اے جناح روڈ اور دیگر اضلاع میں اہم شاہراہوں پربرآمد ہونے والے مرکزی جلوس اور تمام چھوٹے بڑے جلوس کے راستوں پر صبح سے عملہ تعینات رہااور صفائی کے بہترین انتظامات کئے گئے جبکہ جلوس کے راستوں پر پانی کا چھڑکا، مکینکل سوئپنگ اور چونے کا چھڑکا یقینی بنایا گیا ہے اس کے علاوہ جلوس کے دوران بھی سینیٹری ورکزز جلوس کے ساتھ تعینات کئے گئے اور جلوس کے دوران بروقت کچراچننے کا کام انجام دیا گیا۔مختلف جگہوں پر شہریوں کو سہولت کی فراہمی کے لئے کیمپس بھی لگائے گئے۔ شہریوں کی جانب سے موصول ہونے والی شکایات کابروقت ازالہ یقینی بنایا گیا۔متعلقہ افسران نے تمام بلدیاتی اداروں کے ساتھ مکمل کورآڈینشن کرکے انتظامات سنبھالے۔