لندن (این این آئی)پاکستان مسلم لیگ (ن) کے قائد اور سابق وزیراعظم نواز شریف نے کہا ہے کہ 2017 کے ہنستے بستے پاکستان کو سازش کے تحت بربادی کے دہانے پر لا کر کھڑا کیا گیا،قمر باجوہ، فیض حمید، ثاقب نثار، آصف سعید کھوسہ، عظمت سعید پاکستان اور 22 کروڑ عوام کے مجرم ہیں،جب تک سازش میں شامل تمام کرداروں کو کیفر کردار تک نہیں پہنچایا جائے گا پاکستان آگے نہیں بڑھ سکے گا۔ جمعہ کو پاکستان مسلم لیگ (ن ) کی اعلیٰ قیادت کا اجلاس ہوا جس میں میں سابق وزرائے اعظم نواز شریف اور شہباز شریف نے پارٹی رہنماؤں سے سیاسی صورت حال پر گفتگو کی، اس موقع پر سینیٹر اسحاق ڈار اور مریم نواز بھی موجود تھیں۔

اجلاس میں سابق وزراء جاوید لطیف ، عابد شیر علی ، بلال یاسین بھی شریک ہوئے ۔اجلاس میں اظہار خیال کرتے ہوئے نواز شریف نے کہا کہ کھلنڈروں کے ٹولے کو پاکستان پر مسلط کیا گیا، جب تک سازش میں شامل تمام کرداروں کو کیفر کردار تک نہیں پہنچایا جائے گا پاکستان آگے نہیں بڑھ سکے گا۔سابق وزیراعظم نے کہا کہ قمر باجوہ، فیض حمید، ثاقب نثار، آصف سعید کھوسہ، عظمت سعید پاکستان اور 22 کروڑ عوام کے مجرم ہیں۔مریم نواز نے کہا کہ نواز شریف کے استقبال کیلئے بڑے پیمانے پر تیاریاں ہو رہی ہیں۔میڈیا سے گفتگو کرتے ہوئے سابق وزیراعظم شہباز شریف نے کہا کہ نواز شریف کی وطن واپسی کی تاریخ میں کوئی تبدیلی نہیں ہوئی، گوجرانوالہ میں کوئی ملاقات نہیں ہوئی نہ گوجرانوالہ گئے ہیں۔

شہباز شریف نے کہا کہ نواز شریف نے مشورے کیلئے بلایا اس لیے لندن آئے۔سابق رکن پنجاب اسمبلی بلال یاسین نے کہا کہ پورا پاکستان نواز شریف کا منتظر ہے، نواز شریف پاکستان کو کھویا ہوا مقام واپس دلوائیں گے۔طلال چوہدری نے کہا کہ نواز شریف کا پاکستان میں تاریخی استقبال ہوگا، پاکستان کو نواز شریف کی ضرورت ہے۔ انہوں نے کرپشن کی ہوتی تو ہائی جیکر نہ بنایا جاتا، نواز شریف کی واپسی پر قانونی معاملات سے نمٹنے کی تیاری ہے۔ برجیس طاہر نے کہا کہ پاکستان میں کوئی قیادت نواز شریف کے مقابلے میں نہیں، پاکستان کو ان کی بہت ضرورت ہے۔ مسلم لیگ (ن) سعودی عرب کے صدر شیخ سعید نے کہا کہ پاکستان روانگی سے قبل نواز شریف کا مورال بلند ہے، اوور سیز پاکستانیوں کی بڑی تعداد نواز شریف کے ہمراہ پاکستان پہنچیں گی، نواز شریف کی واپسی سے پاکستان کی ترقی کا عمل دوبارہ شروع ہوگا۔