پشاور (این این آئی) پشاور میں معروف ریسٹورنٹ نثار چرسی تکہ کے مالک کو غیر ملکی سیاحوں کے ساتھ نازیبا حرکات کرنے پر پولیس نے گرفتار کر لیا۔میڈیا رپورٹس کے مطابق پشاور پولیس نے نمک منڈی فوڈ سٹریٹ میں روایتی چرسی تکہ کے مشور ریسٹورنٹ کے مالک کو گرفتار کرلیا ہے ۔پولیس کے مطابق نثار خان کے ریسٹورنٹ پر ملکی و غیر ملکی سیاح بڑی تعداد میں روایتی کھانے کیلئے آتے ہیں وہ اکثر غیر ملکی سیاحوں خصوصا خواتین کیساتھ بات چیت اور مذاق بھی کرتے رہتے ہیں اور ساتھ ہی ویڈیوز بھی بنا لیتے ہیں۔

پولیس کے مطابق نثار خان ٹک ٹاک پر بھی سرگرم ہیں اور انہی ویڈیو کے ساتھ میوزک لگا کر ٹک ٹاک پر شیئرکرتے رہتے ہیں۔پولیس کے مطابق نثار خان کی حرکات کی وجہ سے بدنامی بھی ہو رہی تھی۔ ایف آئی ار کے مطابق نثار خان کے خلاف عوامی شکایات بھی موصول ہوئی تھیں جس میں موقف اپنایا گیا تھا کہ نثار خان اپنے ریسٹونٹ میں غیرملکی سیاحوں کے ساتھ کھلے عام نازیبا حرکات کرتے ہیں اور ویڈیو سوشل میڈیا پر اپ لوڈ کرتے ہیں۔نثار خان کے خلاف مقدمہ تھانہ شاہ قبول میں پی پی سی دفعہ 294 کے تحت درج کیا گیا۔