اسلام آباد(این این آئی)سابق وفاقی وزیر اطلاعات و نشریات اور (ن)لیگی ترجمان مریم اورنگزیب نے صدر مملکت ڈاکٹر عارف علوی سے ایوان صدر خالی کرنے کی تاریخ مانگ لی۔ایک بیان میں مریم اورنگزیب نے کہا کہ ڈاکٹر عارف علوی صدارتی مدت پوری ہونے پر ایوان صدر خالی کرنے کی تاریخ دیں۔انہوں نے کہا کہ عارف علوی اپنا بوریا بستر اٹھائیں اور پی ٹی آئی سیکریٹریٹ منتقل ہوجائیں، یہ صرف ملک میں معاشی، سیاسی اور آئینی بحران چاہتے ہیں۔

ن لیگی ترجمان نے کہا کہ 4سال معیشت تباہ، ملک کو ڈیفالٹ کرنے والوں کا کٹھ پتلی نیا آئینی بحران پیدا کرنے پر تلا ہے، اس کا انہیں کوئی اختیار ہے نہ سیاسی و اخلاقی جواز حاصل ہے۔انہوںنے کہاکہ یہ16ماہ کے معاشی استحکام کے خلاف سازش کرنے والے ہیں، یہ خارجی پالیسی کے استحکام کے خلاف سازش کرنے والے ہیں۔

مریم اورنگزیب نے کہا کہ امن اور استحکام جیل میں بیٹھے معاشی دہشت گرد سے برداشت نہیں، عوام کی ترقی، روزی، روٹی کے دشمن آج کے حالات کے ذمہ دار ہیں۔انہوں نے کہا کہ خود غرض سازشی موقع ملتے ہی ملک اور عوام پر ایک نیا وار کرتے ہیں، یہ ملک میں افراتفری، ٹکراو اور گند ڈالنے کی ایک اور مذموم کوشش ہے۔ن لیگی ترجمان نے کہاکہ آئینی منصب کی آڑ میں ایک اور 9مئی کی تیاری دکھائی دے رہی ہے، ملک میں افراتفری اور فساد کی یہ سازش بھی ناکام ہو گی۔