لاہور( این این آئی) لاہور ہائیکورت نے سینئر صحافی اینکر پرسن عمران ریاض بازیابی کیس کی سماعت کرتے ہوئے آئی جی پنجاب کو بازیاب کرانے کے لیے 13 دنوں کی مہلت دے دی ۔ چیف سیکرٹری لاہور ہائیکورٹ جسٹس محمد امیر بھٹی نے عمران ریاض کے والد کی درخواست پر سماعت کی ۔ دوران سماعت آئی جی پنجاب ڈاکٹر عثمان انور سمیت دیگر اعلیٰ افسران عدالت میںپیش ہوئے ۔ آئی جی پنجاب نے فاضل عدالت کو بتایا کہ عمران ریاض کی بازیابی میں کافی مثبت پیشرفت ہوئی ہے ،آئندہ دس سے پندرہ دنوں میں خوشخبری دیں گے ، استدعا ہے عدالت ہمیں مہلت فراہم کرے ۔
چیف جسٹس لاہور ہائیکورٹ جسٹس محمد امیر بھٹی نے استفسار کیا مزید مہلت مانگی جارہی ہے ۔ آئی جی پنجاب نے کہا کہ ہمیں دس دن کی مہلت عنایت کردیں ،ہم خوشخبری دیں گے۔چیف جسٹس لاہور ہائیکورٹ جسٹس محمد امیر بھٹی نے کہا کہ کوئی پیشرفت بھی ہونی چاہیے ۔دوران سماعت عمران ریاض کے وکیل نے کہا کہ ہمیں آئی جی پنجاب ایک گھنٹہ کی میٹنگ کا وقت دیں۔چیف جسٹس محمد امیر بھٹی نے آئی جی پنجاب کو شام پانچ بجے عمران ریاض کے والد اور لیگل ٹیم سے ملاقات کی ہدایت کرتے ہوئے سماعت ملتوی کر دی۔
