کوئٹہ(این این آئی) بلوچستان حکومت کا کوئی بھی نمائندہ وزیراعظم میاں شہباز شریف کے دورہ گوادر میں انکے ہمراہ موجود نہیں تھا ۔ تفصیلات کے مطابق وزیراعظم میاں شہباز شریف نے جمعرات کو گوادر کا دورہ کیا جہاں گورنر بلوچستان ملک عبدالولی کاکڑ اور چیف سیکرٹری، آئی جی پولیس سمیت دیگر حکام نے انکا استقبال کیا ۔
وزیراعظم کے دورہ گوادر کے موقع پر وزیراعلیٰ بلوچستان، صوبائی کابینہ یا کوئی بھی رکن اسمبلی انکے ہمراہ موجود نہیں تھا ۔ ذرائع کے مطابق بلوچستان حکومت نے وزیراعظم کے دورے کا غیر اعلانیہ طور پر بائیکاٹ کیا ہے ۔ واضح رہے کہ وزیراعلیٰ میر عبدالقدوس بزنجو نے گزشتہ روز بھی یہ موقف دیا تھاکہ وزیراعظم کے دورے پر آنے والے اخراجات کو عوام کی فلاح و بہبود پر خرچ ہونا چاہیے ۔
