لاہور ( این این آئی) انسداد دہشت گردی عدالت نے سابق گورنر پنجاب عمر سرفراز چیمہ کی اہلیہ رابعہ سلطان کے جسمانی ریمانڈ کی استدعا مسترد کرتے ہوئے دوبارہ جوڈیشل ریمانڈ پر جیل بھجوا دیا ۔ لاہور کی انسداد دہشتگردی عدالت میں جناح ہائوس میں جلائو گھیرائو اور توڑ پھوڑ کے کیس کی سماعت ہوئی۔
پولیس نے سابق گورنر عمر سرفراز چیمہ کی اہلیہ رابعہ سلطان کو پیش کیا اور ملزمہ کے جسمانی ریمانڈ کی استدعا کی۔ عدالت نے عمر سرفراز چیمہ کی اہلیہ کو جوڈیشل ریمانڈ پر دوبارہ جیل بھیج دیا ہے۔یاد رہے کہ 23جون 2023ء کو عدالت نے سابق گورنر پنجاب عمر سرفراز چیمہ کی اہلیہ رابعہ سلطان کو شناخت پریڈ کے لئے چار روزہ جسمانی ریمانڈ پر جیل بھیج دیا تھا۔ گزشتہ سماعت پر عدالت نے ملزمہ کی 27جون تک شناخت پریڈ مکمل کرنے کا حکم دیا تھا۔
