اسلام آباد (این این آئی)توہین الیکشن کمیشن کیس میں چیف الیکشن کمشنر نے فواد چوہدری کے قابل ضمانت وارنٹ گرفتاری جاری کرتے ہوئے 6 جولائی کو آئندہ سماعت پر ذاتی حیثیت میں پیش ہونے کا حکم دے دیا۔بدھ کو سابق وفاقی وزیر فواد چوہدری کے خلاف توہین الیکشن کمیشن کیس کی سماعت چیف الیکشن کمشنر سکندر سلطان راجہ کی زیر صدارت پانچ رکنی کمیشن نے کی۔
فواد چوہدری طلبی کے باوجود پیش نہ ہوئے، وکیل مرزا آصف کمیشن کے سامنے پیش ہوئے اور سماعت ملتوی کرنے کی استدعا کی۔ وکیل نے کہا کہ اسلام آباد ہائیکورٹ نے اس کیس پر فیصلہ محفوظ کیا ہیجس پر چیف الیکشن کمشنر نے کہا کہ الیکشن کمیشن شوکاز نوٹس کے معاملے پر فیصلہ سنا چکا ہے،آج فواد چوہدری کو ذاتی حیثیت میں طلب کیا تھا،فواد چوہدری نے آج تک جواب جمع نہیں کرایا،الیکشن کمیشن نے فواد چوہدری کو ذاتی حیثیت میں پیش ہونے کا حکم دیتے ہوئے قابل ضمانت وارنٹ گرفتاری جاری کر دیئے۔کیس کی سماعت 6 جولائی تک ملتوی کر دی گئی۔
