لندن(مانیٹرنگ ڈیسک /این این آئی) مسلم لیگ (ن )کے قائد نوازشریف نے شاہد خاقان عباسی کو ٹیلیفون کر کے تحفظات دور کرنے کیلئے لندن آنے کی دعوت دیدی۔خیال رہے کہ سابق وزیر اعظم مسلم لیگ (ن) کے قائد میاں نواز شریف سے ملاقات کیلئے سابق وزیر اعظم شاہد خاقان عباسی منگل کو استنبول سے لندن پہنچیں گے۔ذرائع کے مطابق شاہد خاقان عباسی منگل کی شام مسلم لیگ (ن)کے قائد میاں نواز شریف سے ملاقات کریں گے، ملاقات کے دوران شاہد خاقان عباسی اور میاں نوازشریف کے درمیان پارٹی معاملات پر تبادلہ خیال کیا جائے گا۔دوسری جانب استحکام پاکستان پارٹی کے پیٹرن انچیف جہانگیر خان ترین بھی لندن میں ہی موجود ہیں، جہانگیر خان ترین اپنے طبی معائنے کیلئے لندن گئے ہیں۔ذرائع کے مطابق جہانگیر خان ترین کی لندن میں موجودگی کے باوجود سابق وزیر اعظم نواز شریف سے ملاقات کا کوئی امکان نہیں ہے۔