پشاور(این این آئی)خیبرپختونخوا میں طوفانی بارش نے تباہی مچا دی،چھتیں اور دیواریں گرنے کے محتلف حادثات میں بچے سمیت3افراد جاں بحق جبکہ 20سے زائد زخمی ہوگئے۔خیبرپختونخوا کے ضلع بنوں، لکی مروت، ڈی آئی خان میں طوفانی ہواؤں کے ساتھ موسلادھار بارش ہوئی، بنوں میں تیز بارش اور طوفان نے 8مختلف مقامات پر گھروں کی دیواریں گرا دیں اور کچھ مقامات پر چھتوں کو اڑا دیا۔

ریسکیو ذرائع کے مطابق ضلع بنوں کے مختلف حادثات میں 2افراد جاں بحق جبکہ13افراد زخمی ہوئے، لکی مروت کے علاقے سرائے نورنگ میں ایک بچہ جاں بحق ہو گیا اور سات افراد زخمی ہوئے ہیں۔جاں بحق اور زخمیوں کو ہسپتال منتقل کر دیا گیا جبکہ ہسپتالوں میں ایمرجنسی نافذ کر دی گئی ہے۔ ہسپتال ذرائع کے مطابق زخمیوں میں متعدد افراد کی حالت تشویشناک ہے جس کے باعث ہلاکتوں میں اضافے کا خدشہ ہے۔

موضوعات:طوفانی موسلا دھار بارش