اسلام آباد (این این آئی)پاکستان میں صرف 6 سیکٹرز میں سالانہ تقریبا ایک ہزار ارب روپے کی ٹیکس چوری کا انکشاف ہوا ہے۔بین الاقوامی ریسرچ ادارے ایپسوس نے پاکستان میں ٹیکس چوری سے متعلق رپورٹ جاری کردی، جس کے مطابق ریئل اسٹیٹ سمیت 6 سیکٹرز میں سالانہ 956 ارب روپے کی ٹیکس چوری کا انکشاف ہوا ہے۔
رپورٹ میں بتایا گیا کہ جن سیکٹرز میں ٹیکس چوری کی جارہی ہے ان میں رئیل اسٹیٹ، چائے، سگریٹ، ٹائرز، آئل اور فارما سیوٹیکل شامل ہیں۔رپورٹ کے مطابق رئیل اسٹیٹ سیکٹر میں سالانہ 500 ارب روپے، سگریٹ انڈسٹری میں 240 ارب روپے اور چائے کے شعبے میں سالانہ 45 ارب روپے کی ٹیکس چوری کی جارہی ہے۔غیر ملکی ادارے کی رپورٹ میں ادویات کے شعبے میں بھی سالانہ 65 ارب کی ٹیکس چوری کا انکشاف ہوا ہے جبکہ ٹائرز اور آئل سیکٹر میں سالانہ 106 ارب کی ٹیکس چوری ہورہی ہے۔
