لاہور(این این آئی)وفاقی تحقیقاتی ادارے (ایف آئی اے)لاہور نے سابق وفاقی وزیر مونس الہٰی کے خلاف منی لانڈرنگ کا مقدمہ درج کرلیا۔
ذرائع کے مطابق ایف آئی اے نے مونس الہٰی کے خلاف ریڈ نوٹس بھی جاری کرانے کا فیصلہ کیا ہے۔ایف آئی اے نے مونس الہٰی کے خلاف مقدمہ منی لانڈرنگ اور رشوت کی دفعات کے تحت درج کیا ہے۔ایف آئی آر کے متن کے مطابق مونس الہٰی نے بطور وفاقی وزیر آبی ذخائر کے منصوبوں میں اربوں روپے کی کرپشن کی اور کروڑوں روپے رشوت کی مد میں وصول کئے۔مقدمے میں درج کیا گیاکہ مونس الہٰی نے کرپشن اور رشوت ستانی سے کمائی گئی رقم کی منی لانڈرنگ کی اور فرنٹ مین کے ذریعے اپنی فیملی اور دیگر ملزمان کے اکائونٹس میں رقوم جمع کرائیں۔ایف آئی آر کے متن کے مطابق ملزم نے اکائونٹس میں 121اعشاریہ 65ملین جمع کرائے، تمام رقوم2019 سے2022 میں جمع کرائی گئیں۔
