اسلام آباد(این این آئی)وفاقی وزیر داخلہ رانا ثناء اللہ نے کہا ہے کہ چیئرمین پی ٹی آئی کے خلاف آرمی ایکٹ کے تحت مقدمہ بنتا ہے،کوئی تنظیم ریاست کے خلاف بغاوت کرکے ریلیف کا مطالبہ نہیں کر سکتی۔نجی ٹی وی سے گفتگو کرتے ہوئے رانا ثناء اللہ نے کہا کہ انہوں نے احتجاج نہیں ریاست کے خلاف بغاوت کی،یاسمین راشد لوگوں کو جناح ہاؤس لے جانے میں ملوث ہیں،

حماد اظہر کا بھی مجرمانہ کردار ہے۔وزیر داخلہ نے کہاکہ تحریک انصاف دو یا تین حصوں میں بٹ سکتی ہے،ایک حصہ پیپلز پارٹی میں جائے گا،دوسرا حصہ جہانگیر ترین گروپ میں اور تیسرا پی ٹی آئی میں ہی رہے گا،چیئرمین پی ٹی آئی نااہل ہوئے تو شاہ محمود قریشی پارٹی چلائیں گے۔رانا ثنا ء اللہ نے کہاکہ انہوں نے احتجاج نہیں ریاست کے خلاف بغاوت کی، عام انتخابات اکتوبر، نومبر میں ہوں گے، نواز شریف کو حفاظتی ضمانت ملنی چاہیے،

پارٹی نے نواز شریف کو درخواست کی تھی کہ الیکشن مہم کی قیادت کریں، نواز شریف نے پارٹی کی درخواست پر وعدہ کیا ہے کہ انتخابی مہم میں پارٹی کو لیڈ کریں گے۔انہوں نے کہاکہ جہانگیر ترین کے معاملے پر (ن) لیگ کو ٹھنڈا رہنا چاہیے، ہمارا ووٹ بینک کہیں نہیں جا رہا،پہلے پنجاب میں مقابلہ پی ٹی آئی اور ن لیگ کا تھا لیکن 9مئی واقعات کے بعد حالات بدل گئے۔وزیر داخلہ نے کہاکہ مہنگائی میں لوگوں کو بجٹ میں ریلیف دیں گے،وزیراعظم اور وزیر خزانہ سے مطالبہ ہے کہ سرکاری ملازمین کی تنخواہیں 20سے 25فیصد بڑھائیں۔