لاہور(این این آئی)مظفر گڑھ سے سابق رکن پنجاب اسمبلی نیاز خان گشکوری نے سینئر سیاستدان جہانگیر ترین سے ملاقات کر کے ساتھ چلنے کا اعلان کر دیا۔اس موقع پر رکن قومی اسمبلی سید مبین عالم، سابق مشیر وزیر اعلی پنجاب عبدالحئی دستی، اسحاق خاکوانی، نعمان لنگڑیال، عون چودھری، سعید اکبر نوانی، لالہ طاہر رندھاوا، نذیر بلوچ، فیصل جبوانہ، امین چودھری، قاسم لنگاہ، اسلم بھروانہ، اجمل چیمہ اور غلام رسول سانگھا بھی موجود تھے۔
جہانگیر ترین نے نیاز خان گشکوری کو اپنے گروپ میں شمولیت پر خوش آمدید کہا۔ علاوہ ازیں جہانگیر ترین نے اپنے گروپ کے رہنماؤں سے پارٹی کے قیام بارے حتمی مشاورت کی اور مستقبل کے سیاسی لائحہ عمل پر تفصیلی تبادلہ خیال اور تجاویز پر بھی غور و فکر کیا۔ اجلاس میں ملک کی موجودہ سیاسی صورتحال اور مستقبل کے سیاسی لائحہ عمل پر تفصیلی مشاورت کی گئی۔
