اسلام آباد (مانیٹرنگ ڈیسک) پاکستان مایہ ناز ایٹمی سائنسدان مرحوم ڈاکٹر عبدالقدیر خان کے دست راست ڈاکٹر فاروق کی نظر بندی ختم کر دی گئی۔ اس بات کا انکشاف فضل حسین اعوان نے موقر قومی اخبار میں چھپے اپنے کالم میں کیا، ان کی نظربندی آرمی چیف جنرل عاصم منیر نے ختم کر دی ہے وہ اب آزاد شہری کی طرح کہیں بھی آ جا سکتے ہیں۔
فضل حسین اعوان اپنے کالم میں لکھتے ہیں کہ یوم تکبیر پر ایک حوصلہ افزا پیشرفت یہ ہوئی کہ ڈاکٹر محمد فاروق کی نظر بندی ختم کر دی گئی۔ ڈاکٹر فاروق کو29نومبر2003ء کو حراست میں لیا گیا۔ ان کے بعد ڈاکٹر عبدالقدیر خان کی 4فروری2004ء کو نظر بندی ہوئی تھی۔ ڈاکٹر فاروق 20سال سے نظر بند تھے۔ وہ عبدالقدیر خان کے دست راست تھے اور یہی ان کا جرم ٹھہرا۔آرمی چیف جنرل عاصم منیر کا جنرل جاوید اقبال کی رہائی کے بعد یہ ایک اور بڑا فیصلہ ہے۔ جنرل جاوید کو عمر قید کی سزا سنائی گئی تھی جوجنرل عاصم منیر کے پیشرو آرمی چیف نے کم کرتے کرتے 6ماہ پر محیط کر دی تھی، وہ سزا بھی جنرل عاصم منیر نے ختم کر دی۔
