لاہور( این این آئی) سابق وزیر داخلہ شیخ رشید احمد نے کہا ہے کہ جو سیاسی کچراپارٹی چھوڑ رہاہے وہ کوڑے کے کس ڈرم میں ڈالاجائے گا اس کا فیصلہ جون میں ہوجائے گا،چینی وزیرخارجہ نے پاکستان آکرسمجھایااور سعودی عرب والوں نے وہاں سے پیغام بھجوایا لیکن میں نہ مانوں کی رٹ لگا رکھی ہے ۔
اس وقت شدید سیاسی طوفان ہے جس کی زدمیں صرف غریب عوام ہے ،اگلامشن سپریم کورٹ کو آپس میں لڑواناہے اورسپریم کورٹ کوایگزیکٹوکے تحت دبائومیں لاناہے ،ملک کوکھائی میں لے جاناہے الیکشن میں اپنی مرضی کانتیجہ لاناہے ،سب کچھ سوچے سمجھے منصوبے کے تحت ہورہاہے ،قوم آسمان اورسپریم کورٹ کی طرف دیکھ رہی ہے۔ ٹوئٹر پر جاری اپنے بیان میں شیخ رشید نے کہا کہ نہ سندھ میں سیلاب کے پیسے بانٹے نہ پنجاب میں18لاکھ آٹے کے تھیلے غریب کو دئیے ،ارشد شریف کے بعد سمیع ابراہیم اور عمران ریاض کی باری ہے ،یہ ہے جمہوریت جس کی گروتھ زیرو ہے۔انہوںنے کہا کہ جو سیاسی کچراپارٹی چھوڑ رہاہے وہ کوڑے کے کس ڈرم میں ڈالاجائے گا اس کا فیصلہ جون میں ہوجائے گا،2کچرے کے ڈرم کی پارٹیاں بنائی جائیں گی ،جب ضرورت پڑی تودوسری ڈرم پارٹی کوپہلے ڈرم میں ڈمپ کردیاجائے گا ،کم وبیش100وزیراور مشیر ہیں، مقبول اتنے ہیں جس چینل پر آتے ہیں اس چینل کی ریٹنگ صفر ہوجاتی ہے۔آصف زرداری نے امریکہ میں ڈاکٹر سے ذہنی دماغی توازن ٹھیک نہیں کاسرٹیفکیٹ لیا،نوازشریف نے پلیٹ لیٹس کاسرٹیفکیٹ لندن سے لیا ،میٹرک فیل قادر پٹیل کے ہاتھ15دن بعد عمران خان کے پیشاب کی رپورٹ لگ گئی ،قادر پٹیل کو پیشاب رپورٹ میں پتا چلا کہ جوسارے جہان سے لڑرہاہے وہ دماغی طور پرمضبوط نہیں۔
