لاہور( این این آئی)تحریک انصاف کے چیئرمین عمران خان کی بہنوں نورین نیازی اور عظمی خان نے کہا ہے کہ عمران خان پر ملکی دولت لوٹنے کا کوئی کیس نہیں،عمران خان کے ساتھ ہونے والے ظلم کو رب دیکھ رہا ہے، اس ظلم کا بدلہ رب ان سے لے گا۔
زمان پارک میں میڈیا سے گفتگو کرتے ہوئے نورین نیازی نے کہا کہ حکومت نے منصوبہ بندی کے ساتھ عمران خان کو گرفتار کیا ہے، ہمارے بھائی پر ملکی دولت لوٹنے کا کوئی کیس نہیں۔نواز شریف اور دیگر پر بدعنوانی کے کیس تھے، عمران خان نے ملک کے لئے جو کیا ہے، وہ قائداعظم محمد علی جناح کے بعد کسی نے نہیں کیا۔عظمی خان نے کہا کہ عمران خان کو اغوا ء کیا گیا ہے، میرا بھائی گرفتاری کیلئے ذہنی طور پر تیار تھا، بھائی کو بغیر وارنٹ گرفتار کیا گیا۔انہوں نے کہا کہ عوام کب تک گھروں میں بیٹھیں گے؟ عمران خان کی گرفتاری کے بعد باہر نکلیں۔
