کراچی(این این آئی) پاکستان پیپلز پارٹی سندھ کے سیکریٹری اطلاعات عاجز دھامراہ اور ضلع شرقی کے سیکریٹری اطلاعات وقاص شوکت نے اپنے مشترکہ بیان میں کہا ہے کہ دنیا کو کرونا جبکہ پاکستان کو عمران خان کی شکل میں رونا ہی رونا ملا ہے ۔ انہوں نے کہا کہ پی ٹی آئی کی نالائق حکومت کے سبب عوام کی زندگی پہلے
دن سے ہی اجیرن بن گئی ہے اورہر عام شہری روز گاراور دو وقت کی روٹی کیلئے دھاڑیں مار مار کر رو رہا ہے۔غریب عوام ہر ماہ یوٹیلیٹی بلز کو دیکھ کرموجودہ نالائق حکومت کو بددعائیں دے رہی ہے،لیکن مجال ہے عمران نیازی کو ملک اور عوام کی فکر لاحق ہوئی ہو۔ انہوں نے کہا کہ جب ملک کا وزیراعظم ہی بات بات پر یوٹرن لینے میں یقین رکھتا ہو،تو وہ بھلا کیسے قوم اور ملک کو سنبھال سکتا ہے، پی ٹی آئی کی ناکام حکمت عملی اور غیرسنجیدگی کی وجہ سے جو عوام بیروزگاری اور غربت کے دلدل پھنسی ہوئی تھی،اس پر موجودہ نالائق حکومت نے کرونا وائرس وبا کی مزید مصیبت گرا دی ہے۔ انہوں نے کہا کہ کرونا کیلئے بیرونی ممالک سے ملنے والی امداد کا بھی کوئی حساب نہیںدیا جارہا۔ انہوں نے کہا کہ سلیکٹڈ وزیراعظم نے کووڈ19کو نزلہ اور کھانسی سے تشبہہ دے کر اورخود بیمار ہونے کے بعد غیر ذمہ دارانہ رویہ اختیار کر کے کروڑوں شہریوں کی جان کو موت کے منہ میں دھکیل دیا ہے اور اب جب کرونا کی صورتحال بگڑ گئی ہے تو عوام پر اپنی غلطی تھونپی جارہی ہے۔ پاکستان پیپلز پارٹی سندھ کے سیکریٹری اطلاعات عاجز دھامراہ اور ضلع شرقی کے سیکریٹری اطلاعات وقاص شوکت نے اپنے مشترکہ بیان میں کہا ہے کہ دنیا کو کرونا جبکہ پاکستان کو عمران خان کی شکل میں رونا ہی رونا ملا ہے ۔
