لاہور(آن لائن)پاکستان مسلم لیگ کے نومنتخب سینیٹر کامل علی آغا سے پارٹی کے سینئر نائب صدر چودھری سلیم بریار نے ملاقات کی جس میں سیاسی صورتحال اور ملکی معاملات پر تبادلہ خیال کیا گیا۔ سلیم بریار نے کامل علی آغاکو سینیٹر منتخب ہونے پر مبارکباد دی۔ کامل علی آغا نے کہا کہ سپیکر پنجاب اسمبلی چودھری پرویزالٰہی کی کاوشوں کی بدولت پنجاب میں بلا مقابلہ سینیٹ انتخاب ممکن ہوا، پاکستان مسلم لیگ کی قیادت نے افہام و تفہیم کی فضا پیدا کی جس سے بلا مقابلہ انتخاب کا ہدف حاصل کر کے ممکنہ ہارس ٹریڈنگ کا راستہ روکا گیا۔ انہوں
نے کہا کہ ماضی کی طرح سینیٹ کے فلور پر پارٹی کے نمائندے کی حیثیت سے اپنا بھرپور کردار ادا کروں گا۔ چودھری سلیم بریار نے کہا کہ چودھری شجاعت حسین اور چودھری پرویزالٰہی کی سینیٹ کے حوالے سے کاوشیں قابل تعریف ہیں، پاکستان مسلم لیگ نے ہمیشہ عوام اور ملکی مفاد کی سیاست کی ہے اور ہر فورم پر عوامی ایشوز کو بھرپور انداز سے اٹھایا ہے، امید ہے کہ باقی صوبوں اور مرکز میں بھی سینیٹ انتخابات کا مرحلہ خوش اسلوبی سے مکمل ہو گا۔
