اسلام آباد (این این آئی) پاکستان پیپلزپارٹی کے سینیٹ امیدوارفرحت اللہ بابر کے پاس الیکشن کی فیس کم پڑ گئی،پیپلز پارٹی ارکان نے چندہ کر کے پیسے پورے کئے۔نجی ٹی وی کے مطابق پیپلز پارٹی کے رہنماء فرحت اللہ بابر ہفتہ کو سینیٹ انتخابات میں حصہ لینے کیلئے الیکشن کمیشن

کے دفتر کاغذات نامزدگی جمع کروانے آئے تو ان کے پاس الیکشن کی فیس کم پڑ گئی ۔ الیکشن فیس 40 ہزارروپے تھی جبکہ فرحت اللہ بابر کے پاس 32 ہزارروپے تھے۔فرحت اللہ بابرکے ساتھ موجود پیپلزپارٹی کے ارکان نے چندہ کرکے پیسے پورے کئے، سب سے زیادہ چندہ پیپلزپارٹی کے صوبائی صدر ہمایوں خان نے دیا جبکہ پیپلزپارٹی کے یاورنصیرنے چندے میں پچاس روپے دیئے۔دوسری جانب پاکستان پیپلزپارٹی کی رہنماء شیری رحمن نے کہا ہے کہ کچھ لوگوں کے پیپر آرڈر میں نہیں، نہ ٹکٹ صحیح جاری ہوئے ہیں، کوئی ہوم ورک کرکے نہیں آتا یہ نالائق سرکار ہے،حکومت کی شاہ خرچیاں ختم نہیں ہورہی، غریب عوام کی کوئی پرواہ ہی نہیں ۔کراچی میں الیکشن کمیشن دفتر میں سینیٹ انتخابات کیلئے کاغذات نامزدگی جمع کرانے کے بعد میڈیا سے گفتگو کرتے ہوئے پاکستان پیپلز پارٹی کی رہنماء شیری رحمن نے کہا کہ عوام کی جیبوں پر ڈاکہ ڈالا جا رہا ہے،یہ لوگوں پر گولہ باری کررہے ہیں، انتشار پھیلا رہے ہیں، بجلی کی

قیمتوں میں اضافہ، عوام پر گولہ باری کرنا ہے۔ انہوں نے کہا کہ حکومت کی شاہ خرچیاں ختم نہیں ہورہی، پیسہ کہاں جارہا ہے، حکومت کو غریب عوام کی کوئی پرواہ ہی نہیں ہے۔انہوں نے کہا کہ لگتا ہے کچھ لوگوں کے کاغذات نامزدگی نامکمل ہیںتب ہی تاریخ بڑھائی گئی ہے ۔ انہوں نے کہا کہ کچھ لوگوں کے پیپر آرڈر میں نہیں، نہ ٹکٹ صحیح جاری ہوئے ہیں، کوئی ہوم ورک کرکے نہیں آتا یہ نالائق سرکار ہے۔