اسلام آباد(مانیٹرنگ ڈیسک، آن لائن)سینیٹ کے آئندہ انتخابات کے لئے الیکشن کمیشن آف پاکستان انتخابی شیڈول کے لئے اپنی پرانے ٹائم فریم پر قائم ہے ۔ وہ تاریخ کو آگے لے جانا نہیں چاہتا ۔جس کی خواہش وزیر اعظم عمران خان نے ظاہر کی تھی ۔روزنامہ جنگ میں طارق بٹ
کی شائع خبر کے مطابق سینیٹ انتخابات کے لئے پولنگ آئندہ ماہ مارچ میں ہو گی ۔ 11مارچ کو نو منتخب سینیٹرز حلف اٹھائیں گے ۔سینیٹ کے لئے انتخابی شیڈول آج جاری ہو گا ۔انتخابی ایکٹ2017 کے مطابق یہ انتخابات کرانے کا واحد اختیار الیکشن کمیشن کو حاصل ہے۔اگر 2018 کے سینیٹ انتخابات سے رہنمائی لی جائے تو پورا انتخابی عمل مکمل ہو نے میں ایک مہینہ لگے گا ۔گزشتہ انتخابات میں الیکشن کمیشن نے انتخابی شیڈول 2 فروری 2018 کو جاری کیا تھا ۔3 مارچ کو چاروں صوبائی اسمبلیوں میں سینیٹ امیدواروں کے لئے ووٹ ڈالے گئے تھے ۔قانونی اور آئینی طریقہ کار یہ ہے کہ ریٹائر ہو نے والے سنیٹرز کی مدت مکمل ہو نے سے ایک ماہ کے اندر سینیٹ انتخابات ہوں گے ۔دوسری جانب سینیٹ الیکشن کے لئے حکمران جماعت تحریک انصاف نے اپنے امیدواروں کو شارٹ لسٹ کرلیا ۔ ذرائع کا کہنا ہے کہ امیدواروں کے حتمی ناموں کی منظوری وزیراعظم عمران خان دینگے ۔خیبر پختونخوا سے ثانیہ نشتر،محسن عزیز،شبلی فراز،
حمید الحق،شہزاد گل اعوان کے نام شارٹ لسٹ کئے گئے ہیں ۔پنجاب سے عبدالرزاق داؤد، علی خان ترین،شہباز گل،بیرسٹر شہزاد اکبر،سیف اللہ خان نیازی،اکبر یوسف،آمین اسلم،کامل علی آغا کو شارٹ لسٹ کیا گیا ،وفاقی دارلحکومت سے زلفی بخاری،بابر اعوان ،عامر مغل شارٹ لسٹ ،خو اتین کی نشستوں پر نیلوفر بختیار،نگہت محمود اور نیلم ارشد کو شارٹ لسٹ کیا گیا ہے،سندھ اور بلوچستان سے امیدواروں کا حتمی فیصلہ اتحادیوں کی مشاورت سے ہوگا۔
