مکوآنہ (این این آئی)72سالہ شخص انتقال سے صرف تین گھنٹے پہلے مسلمان ہو گیا۔ 9 فروری کی رات 8 بجے مسلمان ہونے والا لطیف احمد اسی رات گیارہ بجے بطور مسلمان انتقال کرگیا۔ تفصیلات کے مطابق فیصل آباد کے علاقہ گوکھووال ملت روڈ نزد ساندل کالج کا
رہائشی 72 سالہ لطیف احمد گزشتہ شب آٹھ بجے قادیانیت سے تائب ہو کر مبلغ عالمی مجلس تحفظ ختم نبوت مولانا عبدالرشید کے ہاتھ پر مسلمان ہوا اور رات 11 بجے رضائے الہی سے انتقال کر گیا۔ ان کی نماز جنازہ آج 10-02-2021 عصر کی نماز کے بعد گوکھووال میں ادا کرکے مسلمانوں کے قبرستان میں تدفین کی جائے گی۔ نماز جنازہ میں عالمی مجلس تحفظ ختم نبوت کے رہنما و وابستگان بھی شرکت کریں گے۔ چناب نگر کے مستقل رہائشی حال مقیم گوکھووال مرحوم لطیف احمد پچاس سال قبل قادیانی خاندان میں شادی کرکے قادیانیت اختیار کر چکے تھے۔ ان کے والد نے قادیانی خاندان میں شادی کی تھی جس کی وجہ سے چار بھائی و چار بہنوں میں سے دو قادیانیت پر فوت ہوئے جبکہ والد کا پورا خاندان و والدہ کے خاندان کی اکثریت مسلمان ہوگئی تھی باقی بعد ازاں مسلمان ہوگئے تھے۔لطیف احمد کے بیوی بچے جو ملک و بیرون ملک مقیم ہیں چند سال قبل مسلمان ہوگئے تھے جبکہ لطیف احمد انتقال سے صرف تین گھنٹے قبل ہی عقیدہ ختم نبوت پر ایمان لا کر مسلمان ہوئے تھے۔
