لاہور( این این آئی) احتساب عدالت نے چنیوٹ مائنز اینڈ منرلز سکینڈل ریفرنس کی سماعت 6مارچ تک ملتوی کرتے ہوئے ملزمان کو آئندہ سماعت پر ریفرنس کی نقول فراہم کرنے کی ہدایت کر دی ۔ صوبائی وزیر سبطین خان اور دیگر احتساب عدالت میں پیش ہوئے ۔ نیب کی رپورٹ کے بعد عدالت نے سماعت 6مارچ تک ملتوی کردی
اور حکم دیا کہ آئندہ سماعت پرملزمان کوریفرنس کی نقول فراہم کی جائیں ۔ احاطہ عدالت میں صوبائی وزیر اور لیگی کارکنوں میں نا خوشگوار واقعہ بھی پیش آیا ۔ صوبائی وزیر سبطین خان کی صحافیوں سے گفتگو کے دوران لیگی کارکنوں نے دیکھو دیکھو کون آیا چور چور آیا کے نعرے لگائے جس پر سبطین خان کی لیگی کارکنوں سے تلخ کلامی بھی ہوئی ۔روانگی کے موقع پر لیگی کارکنوں نے صوبائی وزیر سبطین خان کی گاڑی پر مکے بھی برسائے ۔ دوسری جانب احتساب عدالت نے اثاثہ جات کیس میں گرفتار سینئر لیگی رہنما خواجہ آصف کے جوڈیشل ریمانڈ میں 18فروری تک توسیع کر دی ۔ احتساب عدالت کے جج جواد الحسن نے سماعت کی ۔ خواجہ آصف کو انتہائی سخت سکیورٹی میں جیل سے عدالت میں پیش کیا گیا ۔ نیب کے تفتیشی افسر نے بتایا کہ ابھی تحقیقات جاری ہیں ۔ خواجہ آصف کے وکیل نے تحریری درخواست پیش کرتے ہوئے موقف اپنایا کہ فیملی ممبران کو خواجہ آصف سے ملاقات کرنے کی اجازت دی جائے ۔ فاضل عدالت نے کہا کہ فیملی کے کون کون سے افراد ملنا چاہتے ہیں ان کا لکھ کر دیں ۔ عدالت نے خواجہ آصف کے جوڈیشل ریمانڈ میں 18فروری تک توسیع کر دی ۔ احتساب عدالت نے چنیوٹ مائنز اینڈ منرلز سکینڈل ریفرنس کی سماعت 6مارچ تک ملتوی کرتے ہوئے ملزمان کو آئندہ سماعت پر ریفرنس کی نقول فراہم کرنے کی ہدایت کر دی ۔
