لاہور( این این آئی )پنجاب اور اسلام آباد میں سی این جی اسٹیشنز بروز اتوار صبح 6 بجے کھل جائیں گے۔ ملک میں گیس کی شارٹیج کی وجہ سے پنجاب اور پوٹھوہار کے سی این جی اسٹیشنوں کو گزشتہ تقریباً 37 دنوں سے گیس کی فراہمی معطل تھی۔اسٹیشنوں کی بندش سے سی این جی اسٹیشن مالکان کو بھاری نقصان اورسی این جی

ملازمین اور گاڑی مالکان کو شدید مشکلات سے گزرنا پڑا۔ دوسری جانب سندھ میں سی این جی کے حصول کے لیے شہریوں کا انتظار120گھنٹوں سے بڑھ کر 144 گھنٹوں تک طویل ہوگیا گیس کی قلت کے باعث سی این جی اسٹیشنز کی بندش کے دورانیے میں مزید 24 گھنٹوں کا اضافہ کردیا گیا۔سوئی سدرن گیس کمپنی کے ترجمان کے مطابق کراچی سمیت سندھ بھر میں سی این جی اسٹیشنز اب ہفتہ کے بجائے اتوار کی صبح کھولے جائیں گے۔ پیر کی صبح 8 بجے سے بند تمام اسٹیشن ہفتے کی صبح کھلنے تھے تاہم ایس ایس جی سی نے ہفتہ کو بھی اسٹیشن بند رکھنے کافیصلہ کیا ہے۔اب تمام سی این جی اسٹیشنز اتوار کی صبح 8 بجے سے 24 گھنٹوں کیلیے کھلیں گے۔ اس طرح شہریوں کو اب سی این جی 120 گھنٹوں کے بجائے 144 گھنٹوں بعد دستیاب ہوگی۔دوسری جانب چیئرمین پاکستان انڈسٹریل اینڈ ٹریڈرز ایسوسی اشنز فرنٹ (پیاف)،میاں نعمان کبیر نے سیئنر وائس چیئرمین ناصرحمید خان وائس چیئرمین پیاف جاوید اقبال صدیقی کے ہمراہ بیان جاری کرتے ہوئے کہا ہے کہ بجلی تیل اور گیس کی قیمتوں میں اضافہ ناقابل قبول ہے. چھوٹی صنعتیں اور تاجر پس کر رہ جائیں گے.حکومت پالیسیوں کی تشکیل میں چھوٹے تاجروں اور چھوٹی صنعتوں کو نظر انداز نہ کرے اور مشاورت سے پالیسیز مرتب کرے۔