اسلام آباد (این این آئی) پاکستان ریلوے کا خسارہ 35 ارب روپے سے بڑھ کر 46 ارب روپے تک پہنچ گیا۔محکمہ ریلوے کی سالانہ رپورٹ کے مطابق سال 2020 کے دوران ریلوے کے خسارے میں تقریباً گیارہ ارب روپے کا اضافہ ہوا۔رپورٹ کے مطابق ریلوے ملازمین کی مجموعی تعداد 67 ہزار 627 ہے تاہم گزشتہ مالی سال کے دوران ان ملازمین کی تنخواہوں کی مد میں 28 ارب 21 کروڑ 44 لاکھ 77ہزار روپے جبکہ ریٹائرڈ ملازمین کو پنشن کی مد میں 31 ارب 41 کروڑ 88 لاکھ 93ہزار

روپے خرچ ہوئے۔ نجی ٹی وی کے مطابق رپورٹ میں انکشاف کیا گیا کہ ریلوے انجنوں، مسافر کوچز اور مال گاڑیوں کے ڈبوں کی تعداد میں کمی آئی اور ریلوے انجن 478 سے کم ہو کر 472 رہ گئے۔رپورٹ میں بتایا گیا ہے کہ مسافر کوچز ایک ہزار 460 سے کم ہو کر ایک ہزار 378 جبکہ مال گاڑیوں کے ڈبے 16 ہزار 159 سے کم ہوکر 14 ہزار 327 رہ گئے۔ رپورٹ میں کہا گیا کہ نا صرف ریلوے اسٹیشنوں کی تعداد میں اضافہ کیا گیا بلکہ مسافروں کی تعداد بھی بڑھ گئی ہے۔