اسلام آباد (این این آئی)وفاقی وزیر اطلاعات سینیٹر شبلی فراز نے کہاہے کہ مریم نواز بہاولپور میں خطاب کرتے ہوئے بھول گئیں کہ شاہی خاندان نے لاہور کو بنانے سنوارنے کے نام پر جنوبی پنجاب کے عوام کے فنڈز پر ڈاکہ ڈالا؟،جاتی عمرہ کے روڈ کی بار بار کارپٹنگ ہوتی رہی اور جنوبی پنجاب کی سڑکیں موہنجوڈارو کا نقشہ پیش کرتی ہیں،مریم کس منہ سے جنوبی پنجاب کا رونا روتی

ہیں۔ اتوار کو اپنے بیان میں انہوںنے کہاکہ افسوس مریم نواز بہاولپور میں خطاب کرتے ہوئے یہ بھول گئیں کہ اس شاہی خاندان نے لاہور کو بنانے سنوارنے کے نام پر جنوبی پنجاب کے عوام کے فنڈز پر ڈاکہ ڈالا۔ انہوںنے کہاکہ جنوبی پنجاب کے عوام تعلیم صحت اور روشنی کو ترستے رہے جبکہ انکے سارے وسائل لاہور پر خرچ کردئیے گئے۔ سینیٹر شبلی فراز نے کہاکہ جنوبی پنجاب کے کاشتکار اس شاہی ٹولے سے نفرت کرتے ہیں۔ وفاقی وزیر نے کہاکہ مسلم لیگ نے اپنے دور حکومت میں انہیں بھوکے مرنے پہ مجبور کیا۔ انہوںنے کہاکہ گنے کے کاشتکار اپنی فصلیں ٹرالیوں پہ لیے حکومتی پالیسیوں کو کوستے،مسلم لیگ نے جنوبی پنجاب کی نفرت میں کپاس کے کاشتکاروں کی زندگیاں تباہ کیں۔ وفاقی وزیر اطلاعات نے کہاکہ فصل کی بیجوں سے لیکر پیسٹیسائیڈ کی فراہمی روک کے اس شاہی ٹولے نے کسانوں کو بھوکے مرنے پہ مجبور کیا۔ سینیٹر شبلی فراز نے کہاکہ جاتی عمرہ کے روڈ کی بار بار کارپٹنگ ہوتی رہی اور جنوبی پنجاب کی سڑکیں موہنجوڈارو کا نقشہ پیش کرتی ہیں، مریم کس منہ سے جنوبی پنجاب کا رونا روتی ہیں۔ وفاقی وزیر اطلاعات نے کہاکہ پی ٹی آئی حکومت جنوبی پنجاب کے عوام سے اپنا وعدہ نبھایا رہی ہے۔ انہوںنے کہاکہ پہلی تخت لاہور کے بجائے سائوتھ پنجاب کے ایک دور افتادہ علاقے سے وزیراعلی منتخب کیا گیا۔ وفاقی وزیر اطلاعات نے کہاکہ علیحدہ سیکریٹریٹ قائم کیا گیا۔اج جنوبی پنجاب میں یکساں ترقیاتی کام ہورہے ہیں۔ سینیٹر شبلی فراز نے کہاکہ عوام مطمئن ہیں یہی خوف ہے اقتدار سے عدلیہ اور اپنی کرتوتوں کی وجہ سے نکالے گئے کرپٹ خاندان کی نیندیں اڑا رہا ہے۔

موضوعات:شبلی فراز مریم نواز