لاہور(پ ر) وزیراعلیٰ پنجاب سردار عثمان بزدار نے کہا ہے کہ پی ڈی ایم مینار پاکستان کے ناکام شو کے بعد منفی سیاست سے توبہ کر لے کیونکہ عوام نے اپوزیشن کی کرپٹ قیادت کے خلاف فیصلہ سنا دیا ہے۔ جلسوں کی طرح پی ڈی ایم کی استعفیٰ
پولیٹیکس بھی بری طرح ناکام ہو گی اور اب ملک میں صرف ترقی اور عوامی منصوبوں کی سیاست چلے گی۔ وزیراعلیٰ عثمان بزدار نے ایک بیان میں کہا کہ عوام کی حمایت سے تحریک انصاف کے مینڈیٹ کے خلاف ہر سازش ناکام بنائی۔ عوامی ترقی کے راستے میں اپوزیشن کے منفی حربے برداشت نہیں کئے جائیں گے۔ مینار پاکستان کے ناکام شو کے بعد اپوزیشن کے پاؤں اکھڑ چکے ہیں اور استعفوں اور لانگ مارچ کی سیاست میں کوئی جان نہیں اور ان میں استعفیٰ دینے کی ہمت ہے نہ لانگ مارچ کرنے کا حوصلہ۔انہوں نے کہا کہ اپوزیشن 2023تک صبر اور آرام کرے۔ عوام کو وزیر اعظم عمران خان کی قیادت پر پورا اعتماد ہے۔
