فیصل آباد (آن لائن)حکومت کی انوکھی منطق، پہلے شادی ہالز میں تقریبات پر پابندی، 8 روز بعد پابندی ختم کر دی گئی۔ ضلعی انتظامیہ نے شادی ہالز تقریبات میں کورونا نئے ایس او پیز پر عملدرآمد کرانے کا فیصلہ کر لیا۔ خلاف ورزی پرشادی ہالزکو موقع پرسیل اور مالک کو گرفتار کر لیا جائے گا۔ تفصیلات کے مطابق پنجاب حکومت نے موسم سرما کی شدت کو پیش نظر رکھتے ہوئے میرج
ہالز اور مارکیز کے اندر تقریبات کرنے کی پابندی ختم کر دی۔’’کورونا‘‘ ایس او پیز پر سختی سے عملدرآمد کرتے ہوئے شادی ہالز اور مارکیز کے اندر موجود گنجائش سے پچاس فیصد کم افراد کے بیٹھنے کی اجازت ہو گی۔ عملے کے ساتھ ساتھ مہمانوں کو ماسک پہننے اور سینی ٹائزرز استعمال کرنے کی ہدایت کی گئی ہے۔ آن لائن معتبر ذرائع نے بتایا ہے کہ اس سلسلہ میں پنجاب حکومت نے باقاعدہ نوٹیفکیشن جاری کرنے کی بجائے تمام اضلاع کی ضلعی انتظامیہ کو زبانی احکامات دیئے ہیں جو شادی ہال مالکان تک پہنچا دیئے گئے ہیں۔ قبل ازیں حکومت نے کورونا کی دوسری لہر میں شدت آنے پر ایک بار پھر سے شادی ہال میں تقریبات کرنے پر پابندی عائد کر دی تھی مگر سردی بڑھنے کی وجہ سے پنجاب حکومت نے اپنے احکامات پر نظرثانی کی اور شادی ہالز/ مارکیزکے اندر تقریبات کرنے کی اجازت دیدی جس سے شادی ہالز مالکان کے ساتھ ساتھ شہریوں میں بھی خوشی کی لہر دوڑ گئی ہے۔شہریوں کا کہنا ہے کہ حکومت نے یہ اجازت دے کر بہت سارا مسئلہ حل کر دیا ہے۔ یہاں پر یہ امر بھی قابل ذکر ہے کہ شادیوں کا سیزن عروج پر ہے حکومت کی طرف سے شادی ہال میں تقریبات میں پابندی کی وجہ سے بہت سارے والدین پریشان تھے۔
