پاکپتن (آن لائن ) میرج مارکی چیک کرنے پر ن لیگی ایم پی اے میاں نوید نے اسسٹنٹ کمشنر کو اغواء کرلیا، مسلح ملزمان کاساتھیوں کے ہمراہ اے سی کو نامعلوم مقام پر لے جا کر بدترین تشدد،تھانہ سٹی پولیس نے ن لیگی ایم پی اے میاں نوید اور والد سمیت 8 افراد کیخلاف مقدمہ درج کرلیا
پولیس ذرائع کے مطابق اسسٹنٹ کمشنر خاور بشیر حکومتی ہدایت پر ون ڈش ایکٹ کیخلاف ورزی پر لیگی ایم پی اے میاں نوید علی کی میرج مارکی میں پہنچے تو وہاں موجود ایم پی اے میاں نوید علی نے دیگر مسلح ساتھیوں کے ہمراہ اسسٹنٹ کمشنر کو بدترین تشدد کا نشانہ بناتے ہوئے اغواء کرلیا۔ پولیس ذرائع کے مطابق ملزمان نے اے سی کو نامعلوم مقام پر تشدد کا نشانہ بناتے رہے اور لیگی ایم پی اے نے اے سی سے سرکاری جرمانہ بک اور جرمانے کی رقم بھی چھین لی،جس پر اسسٹنٹ کمشنر کی منت سماجت پر انہیں تھانے سٹی میں لے جا کر چھوڑ دیا۔تھانہ سٹی پولیس نے اسسٹنٹ کمشنر کی مدعیت میں ن لیگی ایم پی اے میاں نوید،والد رانا احمد علی اور پولیس کانسٹیبل سمیت 8 افراد کیخلاف مقدمہ درج کر لیا۔ ایف آئی آر کے مطابق اے سی مارکی چیک کرنے گئے تو انہیں کہا گیا تمہاری جرات کیسے ہوئی یہاں آنے کی یہ ایم پی اے کی میرج مارکی ہے۔ پولیس نے مقدمہ میں مامزرد پولیس کانسٹیبل کو گرفتار کرلیا جبکہ ایم پی اے سمیت دیگر ساتھیوں کی گرفتاری کیلیے پولیس کے چھاپے جاری ہیں۔
