اسلام آباد (این این آئی)صدر مملکت ڈاکٹر عارف علوی نے سٹیٹ لائف انشورنس کارپوریشن کی نمائندگی مسترد کر تے ہوئے بیوہ کو منافع کے ساتھ انشورنس رقم دینے کی ہدایت کی ہے ۔اتوار کو جاری بیان کے مطابق صدر عارف علوی نے اسٹیٹ لائف کے خلاف وفاقی محتسب کے فیصلے کو برقرار رکھا۔صدر عارف علوی نے انشورنس کمپنی کے بیماری چھپانے کی بنیاد پر انشورنس رقم نہ دینے کے عذر کو مسترد کردیا
۔واضح رہے کہ وفاقی محتسب نے انشورنس کمپنی کو شوہر کی وفات پر بیوہ کو انشورنس کلیم کی معقول رقم دینے کا فیصلہ دیا تھا۔فیصلے میں کہا گیا ہے کہ انشورنس کمپنی نے معمولی بنیادوں پر بیوہ کو رقم دینے سے انکار کیا،پالیسی دیتے وقت بیماری کی چھان بین کرنے کی ذمے داری انشورنس کمپنی پر لاگو ہوتی ہے۔فیصلے میں کہا گیا تھا کہ انشورنس کمپنی تصفیے کی تاریخ تک منافع کے ساتھ بیوہ کو رقم کی ادائیگی کرے۔
