ملتان(آن لائن ) اپوزیشن اتحاد پاکستان ڈیموکریٹک مومنٹ نے 30 نومبر کو ملتان میں جلسہ کرنے کا اعلان کر دیا۔ملتان میں میڈیا سے گفتگو کرتے ہوئے پاکستان مسلم لیگ(ن ) پنجاب کے صدر رانا ثنا اللہ نے کہا کہ جلسوں کے بعد اسمبلیوں سے استعفیٰ دینا بھی ایک آپشن ہے۔انہوں نے کہا کہ ملکی مسائل کا حل فوری انتخابات میں ہے، جب وقت آیا شہریار آفریدی سے 30 کلو منشیات برآمد

کریں گے، عمران خان کو جیل میں ہر قسم کی سہولیات دیں گے۔ایک سوال کے جواب میں انہوں نے کہا کہ شیخ رشید مشرف دور سے ن لیگ کے ٹوٹنے کی پیشگوئی کر رہے ہیں۔ رانا ثناء اللہ نے مز ید کہا کہ وہ گلگت بلتستان کے الیکشن کو شفاف نہیں کہہ سکتے، وہاں پری پول دھاندلی کی جارہی ہے۔ انہوں نے کہا کہ یہ ملک ووٹ کی طاقت سے بنا اور ووٹ کی طاقت سے ہی چلایا جانا چاہیے۔ پی ڈی ایم کی تحریک مرحلہ وار ہوگی، جلسے پہلا مرحلہ ہے اور دو مراحل ابھی باقی ہیں۔ انہوں نے کہا کہ حکومت کی نااہلی اور غلط فیصلوں کی وجہ سےآٹا اور چینی بحران پیدا ہوا۔ آٹا چینی اور بجلی کی مد میں عوام سے 2375 ارب روپے زائد وصول کئے گئے۔ حکومت کی ناقص پالیسیوں کی وجہ سے ملک ری سیشن میں چلا گیا ہے۔رانا ثناء اللہ نے مزید کہا کہ چینی مافیا کو عوام کی جیب پر تین سو ارب روپے کا ڈاکا ڈالنے کی اجازت دی گئی۔ جہانگیر ترین باقاعدہ ڈیل کے تحت اور جوڑ توڑ کے لئے ملک واپس ائے ہیں۔ اب ان کے خلاف سب انکوائریاں بند ہو جائیں گی۔انہوں نے کہا کہ میاں نواز شریف کا 1992 سے بیانیہ سویلین بالادستی کا ہی ہے۔ ملتان میں پی ڈی ایم کا جلسہ سلیکٹرز کے لئے پیغام ہوگا۔ پی ڈی ایم کے پلیٹ فارم پر اسٹیبلشمنٹ سے مذاکرات صرف یہی ہوں گے کہ سیاست میں مداخلت نہ کی جائے۔  پاکستان ڈیموکریٹک مومنٹ نے 30 نومبر کو ملتان میں جلسہ کرنے کا اعلان کر دیا۔

موضوعات:!رانا ثناء اللہ