لاہور( این این آئی )پنجاب اسمبلی میںمسلم لیگ(ن ) کے اراکین اسمبلی کی وزیر اعلیٰ پنجاب سردار عثمان بزدار سے ملاقاتوں کا سلسلہ جاری ہے ، میاں جلیل احمد شرقپوری اور محمد فیصل خان نیازی نے وزیراعلیٰ پنجاب سردار عثمان بزدار سے ملاقات کی ۔لیگی اراکین اسمبلی

نے وزیر اعلیٰ عثمان بزدار کو اپنے حلقوں کے مسائل سے آگاہ کیا ۔وزیراعلیٰ عثمان بزدار نے میاں جلیل احمدشرقپوری کے ساتھ پنجاب اسمبلی میں پیش آنے والے واقعہ کی مذمت کی بھی ۔وزیراعلی عثمان بزدار نے اراکین اسمبلی کو ان کے مسائل حل کرنے کی یقین دہانی کرائی ۔وزیراعلیٰ عثمان بزدار نے میاں جلیل شرقپوری سے کہا کہ آپ قابل احترام ہیں،پنجاب اسمبلی میں آپ سے ناروا سلوک پر دلی دکھ ہوا۔سیاست میں شائستگی کا دامن ہاتھ سے نہیں چھوڑنا چاہیے۔اپوزیشن اراکین کی جانب سے کی گئی حرکت قابل مذمت اورقابل افسوس ہے۔عثمان بزدار نے کہا کہ اراکین پنجاب اسمبلی میرے دست و باز ہیں ،انہیں عزت و احترام دیں گے ۔ انہوں نے کہا کہ ماضی کے حکمرانوں نے ون مین شو کے ذریعے تمام اختیارات اپنی ذات تک محدود رکھے۔میرے دروازے آپ کے لئے ہر وقت کھلے ہیں۔اپوزیشن جماعتیں آگ سے کھیل رہی ہیں،اپوزیشن کی جا نب سے قوم کو تقسیم کرنے کی کوشش کی جارہی ہے۔عثمان بزدار نے کہا کہ پاکستان کے عوام باشعور ہیں اورکرپٹ عناصر کے جھانسے میں کبھی نہیں آئیں گے۔

موضوعات:عثمان بزدار