کراچی(این این آئی) شہرقائد میں اپوزیشن اتحاد پاکستان ڈیموکریٹک مومنٹ(پی ڈی ایم)کے جلسے کے پیش نظر طویل عرصے سے ٹوٹ پھوٹ کا شکار سڑک کی مرمت کردی گئی۔تفصیلات کے مطابق پی ڈی ایم کے جلسے سے پہلے کراچی کے
علاقے خداداد کالونی سے نمائش جانے والی سڑک کی اچانک مرمت کردی گئی۔شہریوں نے صوبائی حکومت کو شدید تنقید کا نشانہ بناتے ہوئے کہا کہ آئے روز یہاں حادثات ہوتے ہیں تب خیال نہیں آیا۔ آج حکمرانوں کو گزرنا ہے تو روڈ بن گئے۔انہوں نے کہاکہ یہ سڑک طویل عرصے سے متاثر رہی لیکن کسی نے کوئی اقدامات نہیں کیے اور اب جلسہ ہے تو سڑک ٹھیک کردی گئی ہے کیونکہ جلسے کے شرکا کو یہاں سے گزرنا ہوگا۔شہریوں نے کہاکہ متعلقہ انتظامیہ اپنے مفادات کے لیے سڑک کی مرمت کررہی ہے اگر شہریوں کا خیال ہوتا تو اس پر پہلے ہی کام شروع کردیا جاتا۔خیال رہے کہ مذکورہ سڑک خراب ہونے کے باعث کئی حادثات بھی پیش آچکے ہیں، علاوہ ازیں شہرکراچی کی ایسی بہت سی سڑکیں ہیں جنہیں مرمت کی ضرورت ہے لیکن صوبائی حکومت کوئی قدم نہیں اٹھا رہی۔
