اسلام آباد (این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے سرکاری ملازمین اور مزدوں کی تنخوا میں اضافے کا مطالبہ کر دیا ۔ جمعرات کو اپنے بیان میں اپوزیشن لیڈر نے کہاکہ 72 سال کے بدترین معاشی بحران کا تقاضا ہے کہ سرکاری ملازمین کی

تنخواہوں میں اضافہ کیاجائے ،بے زبان سرکاری ملازمین کے صبر کاپیمانہ لبریز ہے، حکومت ان کی مشکلات کا احساس کرے ،مہنگائی کی بلند ترین شرح اور کورونا سے درپیش مسائل نے سرکاری ملازمین کی زندگی اجیرن بنادی ہے ۔ انہوںنے کہاکہ کم ازکم 15 سے 20 فیصد تنخواہوں میں اضافے سے 30 ارب کے لگ بھگ رقم خرچ ہوگی جو اتنا بڑا بوجھ نہیں ۔ انہوںنے کہاکہ کرپشن کی روک تھام کے لئے بھی ناگزیر ہے کہ سرکاری ملازمین کی تنخواہوں کو بڑھایا جائے ۔ انہوںنے کہاکہ عام مزدور کی کم ازکم اجرت میں بھی اضافہ کیاجائے ۔ انہوںنے کہاکہ حالات کی سنگینی کا تقاضا ہے کہ عام مزدور، فیکڑی اور مل ملازمین کی اجرت بڑھائی جائے ۔ انہوںنے کہاکہ حکومت ٹیکس اور دیگر مراعات سے صنعت وفیکٹری کو مدد دے کر یہ کام کرسکتی ہے ۔ انہوںنے کہاکہ سرکاری ملازمین اور مزدوروں کو حالات کے رحم وکرم پر چھوڑا گیا تو مزید نقصان ہوگا ۔ انہوںنے کہاکہ تنخواہیں نہ بڑھانے سے فائدے کے بجائے نقصان زیادہ ہوگا، حکومت اس بات کو سمجھے۔

موضوعات:قائد حزب اختلاف شہبازشریف