اسلام آباد (این این آئی)اسلام آباد کی ضلعی انتظامیہ نے کورونا وائرس کے پھیلاؤ کے باعث وفاقی دارالحکومت اسلام آباد کے 4 سب سیکٹرز کو سیل کرنے کا فیصلہ کیا ہے جس کے مطابق سیکٹر جی سکس ون، جی سکس ٹو، جی ٹین فور اور جی سیون ٹو کو24 جون بدھ کی شام سات بجے سیل کر دیا جائے گا۔

اس حوالے سے ڈپٹی کمشنر اسلام آباد حمزہ شفقات نے پیر کی رات کو نوٹیفکیشن جاری کر دیا۔ تفصیلات کے مطابق اسلام آباد میں بڑھتے ہوئے کورونا وائرس کیسز کے باعث انتظامیہ نے ان سیکٹرز کو سیل کرنے کا فیصلہ کیا گیا ہے۔ اس سلسلے میں سیکٹر سیکٹر جی سکس ون، جی سکس ٹو ، جی ٹین فوراور سیکٹر جی سیون ٹو اسلام آباد کے رہائشیوں کو گزشتہ روز24 گھنٹوں کا وقت دیا گیا ہے جو اپنی اشیائے ضروریہ پوری کر لیں۔ ڈپٹی کمشنر اسلام آباد کی جانب سے مذکورہ سیکٹر ز کو سیل کرنے کا باقاعدہ نوٹیفکیشن جاری کر دیا گیا ہے۔ نوٹیفکیشن کے مطابق مذکورہ سیکٹرز کے رہائشیوں کو فارمیسی، میڈیکل سٹورز، گروسری سٹورز، بیکریز اور ہسپتال جانے والے افراد کو ایس او پیز کے تحت استثنیٰ دیا جائیگا ،مذکورہ سیکٹرز کو سیل کرنے کے لئے پاک فوج، رینجرز اور اسلام آباد پولیس کی خدمات لی جائیں گی۔ ڈپٹی کمشنر اسلام آباد کی جانب سے ایڈیشنل ڈپٹی کمشنر (جنرل) کو سیل علاقوں میں فوڈ سپلائی کو یقینی بنانے کی ہدایت کی گئی ہے۔