لاہور (این این آئی) مسلم لیگ (ن ) کے ڈپٹی سیکرٹری جنرل عطا اللہ تارڑ نے کہا ہے کہ نیب نیازی گٹھ جوڑ کے نتیجے میں ہونے والی کارروائیوں کا ڈٹ کر مقابلہ کر رہے ہیں،دو سال سے جاری سیاسی بنیادوں پر قائم کردہ کیسز میں ایک روپے کی کرپشن ثابت نہیں ہوسکی۔اپنے ایک بیان میں انہوںنے کہاکہ کرونا کے کیسز تیزی سے پھیل رہے ہیں اور حکومت انتقامی کارروائیوں میں مصروف ہے۔
اپوزیشن کے ممبران پر قائم کردہ کیس تاریخ کا بدترین سیاسی انتقام ہے۔انہوںنے کہاکہ دوسری طرف سو ارب کی چینی چوری کرنے والے جہانگیر ترین کو شاہانہ پروٹوکول دے کر رخصت کیا گیا۔جہانگیر ترین کا نام نہ تو ای سی ایل میں ڈالا گیا اور نہ ہی ایف آئی اے کی طرف سے پوچھا گیا کہ کس غرض سے باہر جا رہے،رات کے اندھیرے میں جہانگیر ترین کو ملک سے بھگا دیا جاتا ہے اور چھٹی والے دن نیب دفتر کھول کر سلیمان شہباز کے حوالے سے اسٹیٹمنٹ جاری کرتا ہے۔انہوںنے کہاکہ قانون اور ضابطے کیخلاف تعینات ہونے والے شہزاد اکبر لندن سرکاری خرچے پر کیا کرنے جاتے رہے ہیں۔نام نہاد احتساب اور نیب نیازی گٹھ جوڑ کا پول کھل چکا ہے۔
