پشاور(این این آئی)خیبرپختونخوا حکومت کو آئندہ مالی سال کے لیے بجٹ کی تیاری میں مشکلات کا سامنا ہے جبکہ رواں مالی سال صوبائی حکومت کو 50 ارب روپے سے زائد خسارہ ہوا ہے۔ نجی ٹی وی کے مطابق خیبر پختونخوا حکومت نے آئندہ مالی سال کی بجٹ ترجیحات کو حتمی شکل دے دی ہے جن میں رواں مالی سال غیرضروری منصوبوں و اخراجات پر کٹ لگایا جائے گا۔ذرائع کے مطابق بجٹ کا حجم 900 ارب سے زائد متوقع

ہے جبکہ بجٹ میں سالانہ ترقیاتی فنڈ کیلیے 250 ارب روپے مختص کرنے پر غورکیا جا رہا ہے، اس کے علاوہ کورونا وائرس کے باعث محکمہ صحت کا بجٹ 11 ارب سے بڑھا کر 15 ارب کرنے کی تجویز زیر غور ہے، روڈ سیکٹر کا بجٹ 23 ارب سے بڑھا کر 25 ارب تک بڑھانے کا امکان ہے۔ذرائع محکمہ خزانہ کے مطابق تعلیم کے ترقیاتی بجٹ میں ردوبدل نہ کرنے کا فیصہ ہوا ہے جب کہ ایری گیشن ترقی کیلئے رقم بڑھائی جائے گی۔