اسلام آباد ( آن لائن ) پاکستان میں کورونا سے ہونے والی اموات کی تعداد 1ہزار سے تجاوز کرگئی ہے۔ اعدادوشمار کے مطابق ملک میں اب تک 1003مریض کورونا سے جاں بحق ہوچکے ہیں جبکہ کورونا سے متاثرہ افراد کی مجموعی تعداد 46ہزار915ہوگئی ہے۔ اب تک ملک میں 13ہزار101مریض صحتیاب ہوکر گھروں کو بھی جاچکے ہیں۔

اب تک ملک میں 4لاکھ14ہزار سے زیادہ ٹیسٹ کیے جاچکے ہیں جبکہ مزید ٹیسٹ کیے جارہے ہیں۔خیال رہے کہ پاکستان میں 26 فروری سے 31 مارچ تک لگ بھگ 2 ہزار کیسز اور 26 اموات تھیں جس میں اپریل میں اضافہ ہوا اور 30 اپریل تک ساڑھے 16 ہزار سے زائد کیسز اور اموات 385 تک پہنچ گئیں۔ تاہم مئی کے آغاز سے ہی اس وائرس کی ایک نئی لہر دیکھنے میں آئی اور پاکستان میں صرف مئی کے گزشتہ 19 روز میں 28 ہزار سے زائد کیسز اور 584 اموات کا اضافہ ہوا۔آج (20 مئی) کو بھی ملک میں وائرس سے متاثرہ افراد کی تعداد بھی بڑھی جبکہ اس سے صحتیاب ہونے والوں میں بھی اضافہ سامنے آیا۔سندھ ملک میں کورونا سے سب سے زیادہ متاثر ہونے والا صوبہ ہے جہاں اب تک 18ہزار964کیسز سامنے آچکے ہیں، پنجاب میں 16ہزار685، بلوچستان میں 2885، خیبرپختونخوا میں 6554، آزاد جموں کشمیر میں 133 اور گلگت بلتستان میں 556 کیسز سامنے آچکے ہیں۔ اسلام آباد میں 1138کیسز سامنے آئے ہیں۔ دوسری جانب بیرونِ ملک پھنسے پاکستانیوں کی آمد کا سلسلہ بھی جاری ہے، بیرون ملک پاکستانیوں اور پاکستان میں پھنسے ہوئے غیر ملکیوں کی وطن واپسی کیلئے حکومتی اقدامات کے تحت غیر ملکی خصوصی پروازوں کو پاکستان میں لینڈ کرنے کی اجازت دے دی گئی ہے۔