لاہور( این این آئی)پاکستان اوورسیز ایمپلائمنٹ پروموٹرز ایسوسی ایشن کے وائس چیئرمین سید اطہر اقبال نے کہا ہے کہ کورونا وائرس کی وجہ سے مختلف ممالک کے 2لاکھ سے زائد ویزے ضائع ہونے کا خدشہ پیدا ہو گیا ہے جن میں سے 77ہزار ویزوں کا پروٹیکٹر بھی ہو چکا ہے ،بیرون ممالک میں ہزاروںپاکستانیوں کی نوکریاں ختم ہو چکی ہیں ،حکومت او پی ایف اور انشورنس کی مد میں جمع ہونے والے

اربوں روپے موجودہ حالات میں مشکل کا شکار ہونے والے اوور سیز پاکستانیوں کیلئے مختص کرے ،اوور سیز پروموٹرز دیوالیہ ہونے کے قریب پہنچ گئے ہیں حکومت سے مطالبہ ہے کہ دوسرے شعبوںکی طرح ہمارے لئے بھی پیکج اور بلا سود قرضوں کی فراہمی کا اعلان کیا جائے۔ اپنے بیان میں انہوںنے کہا کہ ہمارا شعبہ ایسا ہے جو کورونا وائرس کی وباء کے تھمنے کے بعد سب سے آخر میں فعال ہوگا ۔کورونا وائرس کی وجہ سے 2لاکھ ویزے ضائع ہونے کا خدشہ پیدا ہو گیا ہے جن میں سے 77ہزار ویزوں کا پروٹیکٹر بھی ہو چکا ہے ،میڈیکل اور فنگر پرنٹس سمیت دیگر فیسوں کی مد میں کروڑوں روپے کی ادائیگیاں ہو چکی ہیں ۔ انہوں نے کہا کہ اوورسیز پاکستانی ہر سال اربوں ڈالرز کا زر مبادلہ اپنے ملک بھجواتے ہیں لیکن مشکل کی اس گھڑی میں حکومت کی جانب سے اوورسیز پاکستانیوں اور پروموٹرز کے لئے کوئی اقدامات نہیں کئے گئے ۔ا گزشتہ سال 6لاکھ سے زائد پاکستانیوں کو مختلف ممالک میں بھجوایا گیا اور او پی ایف اور انشورنس کی مد میں وصول کئے گئے چارجز اربوں روپے بنتے ہیں جنہیںمشکل کی اس گھڑی میں اوورسیز اور پروموٹرز کو سہارا دینے کیلئے استعمال میں لایا جائے ۔ حکومت سے مطالبہ ہے کہ دوسرے شعبوں کی طرح ہمیں بھی بلا سود قرضے دئیے جائیں اور ادائیگی کیلئے گریس پیریڈ دیا جائے ۔