اسلام آباد(آن لائن)’’ دوسروں کو نصیحت،خود میاں فصیحت‘‘،وفاقی نظامت تعلیمات کے ڈائریکٹر ایڈمن ثاقب شہاب نے مریم نواز شریف کے شروع کئے گئے منصوبے ایجوکیشن ریفارم پروگرام میں کنٹریکٹ پربطور مونٹیسوری ٹیچر بھرتی کرائی گئی اپنی اہلیہ عاصمہ منو رکو غیر قانونی طورپر گریڈ 17کی سیکنڈری سکول ٹیچرکی پوسٹ پر ریگولرائز کرالیا ۔عاصمہ منورکے آن لائن کو دستیاب ڈیکارڈ کے مطابق
ثاقب شہاب کی سفارش پر سابق دور حکومت میں وفاقی دارلحکومت میں شروع کیئے گئے ایجوکیشن ریفارم پروگرام میں کنٹریکٹ پر بطور منٹیسوری ٹیچر اپنے کیریئر کا آغاز کیا ۔اس وقت کی وزارت تعلیم میں بطور اسسٹنٹ ایجوکیشن ایڈوائزر تعینات ثاقب شہاب نے اپنی اہلیہ کو تین مختلف اداروں میں شفل کرواتے ہوئے حکام کی آنکھوں میں دھول جھونک دی ۔جس کے بعد انہوں نے اپنی اہلیہ اسلام آباد ماڈل سکول فار گرلز (IV)سوہان میں بطور ایس ایس ٹی ٹیچر تعینات کروا لیا ۔واضح رہے وفاقی نظامت تعلیمات کے زیر انتظام چلنے والے تعلیمی اداروں میں اس وقت سینکڑوں کی تعداد میں ڈیلی ویجز و کنٹریکٹ اساتذہ عرصہ دراز سے اپنی ملازمتوں کی مستقلی سمیت تنخواہوں کیلئے در در کی ٹھوکریں کھانے پر مجبور ہیں۔ایسے میں جب ایک طرف سینکڑوں میرٹ پر پوار اترنے والے اساتذہ کرام جن میں خواتین اساتذہ کی ایک بڑی تعداد شامل ہے اپنی جائز قانونی حق سے محروم ہیں ،وہیں دوسری طرف ایف ڈی ای میں بطور ڈائریکٹر ایڈمن تعینات ثاقب شہاب کی طرف سے اپنی کنٹریکچوئل ملازم اہلیہ کو انتہائی قلیل عرصہ میں جعل سازی سے مونیٹیسوری ٹیچر سے ڈائریکٹ ایس ایس ٹی ریگولرائز کروا لینا ادارے کی میرٹ اور شفافیت کے دعووں کی کلی کھولنے کیلئے کافی ہے ۔آن لائن کے ذرائع اس امر کی تصدیق کرتے ہیں کہ ڈائریکٹر ایڈمن ایف ڈی ای ثاقب شہاب ادارے میں بطور قائم مقام تعینات ڈائریکٹر جنرل تعینات عمیر احمد کے کافی قریب گردانے جاتے ہیں،اور اسی تعلق کو استعمال کرتے ہوئے انہوں نے سینکڑوں اہل امیدواروں کے حق پر ڈاکہ ڈالتے ہوئے اپنی اہلیہ کو بطور سیکنڈری سکول ٹیچر (گریڈ 17)کی پوسٹ پر ریگولرائز کروالیا ہے ۔۔۔توصیف
