لاہور( این این آئی)چین کی کمیونسٹ پارٹی کی جانب سے پاکستان مسلم لیگ (ن)کے صدر اور قائد حزب اختلاف شہبازشریف کو تہنیتی خط ارسال کیا گیا ہے ۔چین کی کمیونسٹ پارٹی کی مرکزی کمیٹی کے انٹرنیشنل ڈیپارٹمنٹ نے تین صفحات پر مبنی خط ارسال کیا ہے جس میں کہا گیا ہے کہ کورونا کے خلاف جنگ میں چین کی حمایت اور یکجہتی کے اظہار پر شہبازشریف اور مسلم لیگ (ن)کے مشکور ہیں۔
خط کے متن میں کہا گیا ہے کہ کورونا نے تمام ممالک میں عوام کی صحت وسلامتی کو خطرات سے دوچار کردیا ہے،کورونا کے خلاف جنگ میں پاکستانی معاشرے کے مختلف طبقات نے چین کی حمایت کی،چین کی حمایت میں پاکستانی معاشرے کی طرف سے دل چھو لینے والے واقعات سامنے آئے ۔ خط کے متن میں کہا گیا ہے کہ پارٹی کے جنرل سیکرٹری ژی جن پنگ کی قیادت اور ذاتی نگرانی میں وبا ء کی روک تھام کی صلاحیت اور رفتار مزید بڑھائی ہے ،چین کی معیشت اور معاشرہ معمول پر واپس آرہے ہیں، زندگی اور پیداوار تیزی سے بحال ہورہی ہے ،اس عمل میں حفاظت اور بچائوکے اقدامات مستقل بنیادوں پر لاگو کئے گئے ہیں ،بنی نوع انسان کے لئے مشترکہ مستقبل کی سوچ کے تحت چین نے ہمیشہ کھلا، شفاف اور ذمہ دارانہ اندازاپنایا ہے ۔ خط کے متن میں کہا گیا ہے کہ ناسی سوچ کے تحت عالمی ادارہ صحت اورعالمی برادری کو بروقت معلومات فراہم کیں، اپنی استعداد کے مطابق ممالک کی مدد کی اور وائرس کے خاتمے کے لئے وسیع تعاون کیا ،چین پاکستان مسلم لیگ (ن)سمیت دنیا بھر کی سیاسی جماعتوں کے ساتھ کام کرنے کو تیار ہے ،ہم کورونا وباء کے انسداد کے لئے اپنا تجربہ بانٹیں گے اور تعاون پر مبنی اقدامات کرتے رہیں گے ۔ خط کے متن میں مزید کہا گیا ہے کہ کورونا کے خلاف پوری عالمی برادری کو متحد ہوکر کام کرنا ہوگا ،عالمی صحت مند معاشرے کے قیام کے لئے مل کر کام کرنے کی ضرورت ہے تاکہ سب سلامتی وخوشحالی سے ہمکنار ہوں۔پاکستان مسلم لیگ (ن)پاکستان کی ایک اہم سیاسی قوت ہے، پاکستان مسلم لیگ (ن) نے نے چین پاکستان سدابہار سٹرٹیجک اینڈ کوآپریٹو پارٹنرشپ کو فروغ دینے میں گراںقدرکام کیا ہے ۔سی پی سی روابط اور تعاون کو مزید گہرا کرنے کے لئے تیار ہے ، پاکستان مسلم لیگ (ن) کے ساتھ پارٹی کی سطح پر تعاون کا فروغ چاہتے ہیں ، پاکستان مسلم لیگ (ن) کے ساتھ نیو ٹائپ پارٹی ٹو پارٹی تعلقات استوار کرنے کے خواہاں ہیں ۔
