اسلام آباد (مانیٹرنگ ڈیسک) پاکستان مسلم لیگ (ن) کے صدر شہباز شریف لندن سے پاکستان آنے کے لئے ہیتھرو ائیرپورٹ کیلئے روانہ ہو گئے ہیں۔ روانگی سے قبل شہباز شریف نے اپنے ویڈیو بیان میں کہا کہ پاکستان سمیت دنیا بھر میں کرونا وائرس نے تباہی مچا رکھی ہے، پوری دنیا کو اللہ پاک اس وائرس سے محفوظ رکھے،

پاکستان کرونا وائرس کے حملے کے پیش نظر عوام کی خاطر آ رہا ہوں، انہوں نے کہا کہ میں پاکستان واپس آنا چاہتا تھا تاکہ اپنے پاکستانی بہن بھائیوں کے ساتھ موجود رہوں۔ شہباز شریف نے کہا کہ اپنے بڑے بھائی کی علالت ادھوری چھوڑ کر وطن واپس پہنچ رہا ہوں۔ پارٹی رہنماؤں اور کارکنوں کو ہدایات جاری کرتے ہوئے انہوں نے کہا کہ وہ ائیرپورٹ نہ آئیں۔ انہوں نے کہا کہ پارٹی رہنما اور کارکنان احتیاطی طبی ہدایات پر سختی سے عمل کریں۔ شہباز شریف نے کہا کہ گرفتاریوں سے نہیں ڈرتے، انہوں نے کہا کہ اپنے بڑے بھائی کی علالت کے باوجود پاکستان اور اپنی عوام کی خاطر واپس آ رہا ہوں، انہوں نے کہا کہ مجھ سے نواز شریف نے کہا کہ میری صحت کی فکر نہ کریں، قوم کو تمہاری ضرورت ہے۔  ان کا مزید کہنا تھا کہ گرفتاریوں سے ہم نہیں ڈرتے، موجودہ ملکی حالات کو دیکھتے ہوئے اپنے بھائی کی علالت کے باوجود پاکستان اور اپنی عوام کی خاطر وطن واپس آ رہا ہوں، مجھے بڑے بھائی نے کہا ہے کہ میری صحت کا فکر نہ کرو قوم کو تمہاری ضرورت ہے۔واضح رہے کہ شہباز شریف صبح پاکستان واپس پہنچیں گے۔ ہیتھرو ائیرپورٹ روانہ ہونے سے قبل انہوں نے اپنی والدہ اور میاں نواز شریف سے ملاقات کی۔والدہ نے انہیں دعاؤں کے ساتھ رخصت کیا۔