لاہور( این این آئی )پاکستان مسلم لیگ (ن) کی مرکزی ترجمان مریم اورنگزیب نے کہا ہے کہ عمران مافیا کی جانب سے کروڑوں روپے رشوت لے کر حفاظتی ماسک سمگل کرنے کی تحقیقات کرائی جائیں ،عمران صاحب صحت کے وزیر ہیں جواب دیں ،تاریخ کی پہلی حکومت ہے جو عوام کی جان سے کھیل رہی ہیں ۔ اپنے بیان میں انہوں نے کہا کہ پہلی حکومت ہے جو عوام کا آٹا ، چینی ، گیس اور بجلی چوری کر رہی ہے ،قوم کی جان خطرے میں ہے اور عمران مافیا کروڑوں روپے رشوت لے کر حفاظتی ماسک سمگل کررہا ہے ،

آٹا ،چینی چوری اور سمگلنگ کے بعد حفاظتی ماسک بھی عمران مافیا کی ہوس زر کی نذر ہوگئے ،یہ ہے عوام دشمن عمران مافیا اورگرفتاریاں سیاسی مخالفین اور میڈیا کی ہو رہی ہیں ،پوری قوم کی زندگی کو 6 کروڑ میں بیچ دیاگیا،2 کروڑ حفاظتی ماسک بیرون ملک سمگل کرنے سے ملک میں قلت پیدا ہوئی ،عمران مافیا جوماسک پر بھی پیسہ کمارہا ہے وہ کورونا سے قوم کو کیا بچائے گا،نیب نیازی گٹھ جوڑ کو صرف سیاسی مخالفین اور میڈیا کے لئے استعمال کیا جا رہا ہے اور عمران مافیا دونوں ہاتھوں سے عوام کو لوٹ رہا ہے۔‎