اسلام آباد(این این آئی) کرونا وائرس کی بڑھتی ہوئی وبا کو مد نظر رکھتے ہوئے اراکین پارلیمنٹ، پارلیمنٹ سٹاف اور دیگر پارلیمنٹ میں آنے والے مہمانوں کی حفاظت کو مدنظر رکھتے ہوئے چیئرمین سینیٹ محمد صادق سنجرانی نے ایوان بالاء کی کمیٹیوں کے اجلاس، تقریبات و پارلیمانی اجتماعات کو دو ہفتوں کے لئے منسوخ کر دیا۔اس سلسلے میں باضابطہ نوٹیفکیشن جاری کر دیا گیا۔
چیئرمین سینیٹ محمد صادق سنجرانی نے اراکین پارلیمان، پارلیمنٹ کے ملازمین کو غیر ضروری اجتماعات میں شرکت کرنے سے بھی گریز کرنے کی ہدایت کر دی۔ چیئرمین سینیٹ نے کہا کہ عالمی سطح پر ایک مشکل صورتحال درپیش ہے اور کرونا کی وباء بے شمار ممالک کو اپنی لپیٹ میں لے چکی ہے کروناوائرس کے پھیلاؤ اور بچاؤ کیلئے حفاظتی تدابیر اختیار کرنا ہمارا سماجی و معاشرتی فرض ہے۔ حفاظتی تدابیر اختیار کر کے ہم نہ صرف خود کو بلکہ اپنے اہل خانہ اور سوسائٹی کو بھی محفوظ بنا سکتے ہیں۔ انہوں نے کہا کہ پاکستان میں بھی کرونا وائرس کے متاثرین کے کیسز سامنے آ رہے ہیں لہذا جتنی زیادہ احتیاط اختیار کی جائے اتنا ہی زیادہ خود کو محفوظ بنایا جا سکتاہے۔چیئرمین سینیٹ محمد صادق سنجرانی نے قوم سے خصوصی دعاؤں کی اپیل کرتے ہوئے اللہ تبارک تعالیٰ سے تمام انسانیت کو اس موذی وبا ء سے محفوظ رکھنے کی دعا بھی کی۔چیئرمین سینیٹ نے کہا کہ عوام کوشش کریں کہ اپنے گھروں تک محدود رہیں زیادہ رش والے مقامات پر نہ جائیں اور غیر ضروری نقل و حرکت سے گریز کریں۔
