اسلام آباد(مانیٹرنگ ڈیسک)پاکستان علماء کونسل کی اپیل پر آج ملک بھر میں کرونا وائرس کے خاتمے کے لیےیوم دعا منایا جائے گا۔ خطبات جمعہ میں علماء و مشائخ ، آئمہ و خطبا اس وبائی مرض سے بچائو کی تدابیر کے بارے میں بھی قوم کو آگاہ کریں گے۔ کرونا وائرس کے خاتمے کے لیے حکومت ہی نہیں معاشرے کے ہر فرد کو اپنی ذمہ داری ادا کرنا ہوگی ۔ کرونا وائرس دنیا بھر کے معاشروں کو اپنی لپیٹ میں لے رہا ہے،
چین ، ایران اور اٹلی ایسے کئی ممالک میں اس وائرس نے تباہ کن اثرات مرتب کیے ہیںاب پاکستان میں بھی چند کیسز سامنے آچکے ہیں۔ اس وبا کی روک تھام کے لیے حکومت کو وسیع البنیاد حکمت عملی اپنانا ہوگی۔ ان خیالات کا اظہار چیئرمین پاکستان علماء کونسل و صدر وفاق المساجد و المدارس پاکستان حافظ محمد طاہر محمود اشرفی ، مولانا اسد زکریا قاسمی، مولانا عبدالکریم ندیم ، مولانا محمد رفیق جامی ، علامہ عبدالحق مجاہد، مولانا اسد اللہ فاروق، علامہ طاہر الحسن ، قاضی مطیع اللہ سعیدی ، مولانازبیر عابد ، مولانا اسید الرحمٰن سعید ، مولانا اشفاق پتافی، مولانا نعمان حاشر ، مولانا ابوبکر صابری و دیگر نے اپنے ایک بیان میں کہی ۔ قائدین نے کہا ہے کہ کرونا وبائی مرض ہے اور وبائی امراض سے نجات کے لیے شریعت اسلامیہ نے جو رہنمااصول بتائے ہیں ہمیں ان پر چل کر اس وبا سے نجات حاصل کرنے کی جدو جہد کرنی ہوگی۔ ملک بھر کے علماء و مشائخ ، آئمہ و خطبا ء سے اپیل کی جاتی ہے کہ آج جمعۃ المبارک کے خطبات میں عوام الناس کو کرونا ایسے وبائی مرض کے اثرات سے ناصرف آگاہ کریں بلکہ اس خطرناک وائرس سے بچائو کے لیے جو تدابیر عالمی و قومی ادارہ صحت اور مستند ماہرین طب کی جانب سے بتائی جارہی ہیں، ان کے بارے میں بھی آگہی دیں۔ عوام الناس کو یہ بھی بتایا جائے کہ صفائی نصف ایمان ہے، اپنے اردگرد کے ماحول کو صاف ستھرا رکھ کر ہی ایسے وبائی امراض سے بچا جاسکتا ہے۔ تمام مسلمان پانچ وقت نماز کی پابندی کریں ،نماز کی ادائیگی کے لیے تازہ وضو کریں اور اپنے ہاتھوں کو بار بار دھوئیں۔
