اسلام آباد(مانیٹرنگ ڈیسک)گزشتہ روز اسلام آباد میں شکرپڑیاں کے قریب طیارہ حادثہ میں شہید ہونے والے ونگ کمانڈر نعمان اکرم کی نماز جنازہ لاہور میں ادا کر دی گئی۔ونگ کمانڈر نعمان اکرم کی نماز جنازہ لاہور میں عسکری ٹین میں ادا کی گئی۔
معروف مذہبی اسکالر مولانا طارق جمیل نے شہید پائلٹ کی نمازجنازہ پڑھائی۔نماز جنازہ میں اعلیٰ فوجی اور سول قیادت نے شرکت کی۔بعدازاں شہید پائلٹ کو پورے فوجی اعزاز کے ساتھ سپردِ خاک کر دیا گیا۔یاد رہے کہ گزشتہ روز راولپنڈی میں بھی ان کی نمازِ جنازہ ادا کی گئی تھی۔چیئرمین جوائنٹ چیفس آف سٹاف کمیٹی جنرل ندیم رضا، پاک فضائیہ کے سربراہ ایئر چیف مارشل مجاہد انور خان، پاک بحریہ کے سربراہ ایڈمرل ظفر محمود عباسی سمیت دیگر فوجی و سول حکام نے نماز جنازہ میں شرکت کی۔دوسری جانب پاک فوج کے شعبہ تعلقات عامہ (آئی ایس پی آر) کے مطابق بری فوج کے سربراہ جنرل قمر جاوید باجوہ نے شہید ونگ کمانڈر نعمان اکرم کو زبردست انداز میں خراج عقیدت پیش کیا اور دعا کی کہ اللہ تعالی نعمان اکرم کو بلند درجات عطاء فرمائے ۔
