کراچی(این این آئی) جمعیت علمائے پاکستان کے رہنماعلامہ قاری قاضی محمدادریس قادری نے کہاہے کہ مسلمان رشوت اور سود کے لین دین سے بازآجائیں اور اپنی عاقبت کی فکر کریں، ناجائزمنافع خوری اور ذخیرہ اندوزی کی دین اسلام میں کوئی گنجائش نہیں ہے لہٰذامسلمان سوچ سمجھ کر کاروبارکریں۔
یہ باتیں انہوں نے گلشن اقبال میں درس قرآن کے موقع پر خطاب کرتے ہوئے کہیں۔اس موقع پراپنے خطاب میں قاری ادریس قاضی نے کہاکہ ملک میں عصبیت ولسانیت اور فرقہ واریت کی آگ بھڑکانے والے ملک وقوم کے دشمن اور بیرونی قوتوں کے آلہء کار ہیں،کراچی میںچوری ڈکیتی اور چھیناجھپٹی کی وارداتیں حکومتی اداروں کی نااہلی ہے حقیقت یہ ہے کہ حکمران امن وامان کے قیام اور عوام کے جان ومال کے تحفظ میں ناکام ہوچکے ہیں ۔انہوں نے کہاکہ جمعیت علمائے پاکستان اپنے قائدعلامہ ڈاکٹرصاحبزادہ ابوالخیرمحمدزبیر کی قیادت میں ملک میں مصطفیٰ کریم ؐ کے نظام کی جدوجہد کررہی ہے اور ان شاء اللہ اس میں ضرورکامیاب ہوں گے ۔انہوں نے کہاکہ قیام پاکستان سے اب تک ملک میں نفاذنظام مصطفیٰؐ کے حوالے سے جے یوپی کی خدمات روزروشن کی طرح عیاں ہیں ،جبکہ دیگر جماعتوں کا کردار اب کھل کر سامنے آچکاہے۔انہوں نے کہاکہ رسول پاک ؐ سے محبت اور ایمان کاتقاضہ ہے دشمنان اسلام جان لیں کہ مسلمان اپنے نبیؐ کی حرمت وناموس پر جانیں قربان کرنے سے بھی دریغ نہیں کریں گے۔
