اسلام آباد(این این آئی)وفاقی وزیر برائے تعلیم شفقت محمود نے کہا ہے کہ ملک کے تمام اسکولوں اور مدارس میں یکساں تعلیمی نصاب نافذ کیا جائیگا۔منگل کو منعقدہ تقریب سے خطاب کے دوران شفقت محمود نے کہا کہ ہمارے مذہب اور زبانیں مختلف ہو سکتی ہیں تاہم ہمارا دل پاکستانی ہے، ہم سب ایک ہیں، ہم سب میں پاکستان ایک مشترکہ چیز ہے، ہماری کوشش ہے کہ جہاں قومی ثقافت کو فروغ دیا جائے

وہی علاقائی ثقافت کو بھی فروغ دیا جائے، ہمیں مختلف مشکلات کا سامنا ہے لیکن انہیں ہم سب کو مل کر حل کرنا ہے۔وفاقی وزیر نے کہا کہ پاکستان میں اقلیتوں کو ہر طرح کی آزادی میسر ہے، وزیراعظم کی سوچ اور وژن کے مطابق کرتار پور کوریڈور کھولا گیا، گورو نانک یونیورسٹی بھی بنائی جا رہی ہے، ہم تمام اقلیتوں کو سہولیات دینا چاہتے ہیں جب کہ بھارت میں مسلمانوں کو حقوق نہیں دیے جا رہے، کشمیر میں بھی لوگوں کی زندگی اجیرن ہو گئی ہے.شفقت محمود نے کہا کہ ہمارا تعلیمی نظام 3 طبقات میں بٹا ہوا ہے، ہم نے بچوں کو سرکاری اسکول، ایلیٹ اسکول اور مدارس میں بانٹ کررکھ دیا ہے، ہم نے تہیہ کیا کہ ہم یہ تفریق ختم کریں گے، یہ ہم سب کا پاکستان ہے تو مذاہب کے علاوہ تعلیم بھی ہم سب کو برابر دینی ہے، ہمیں یکساں نصاب تعلیم بنانا ہے، یہ نصاب تمام پاکستان کے اسکولوں میں ہوگا، تمام اسکولوں میں نصاب ایک ہی ہو گا۔

موضوعات:شفقت محمود وفاقی وزیر برائے تعلیم