تتہ پانی(آن لائن) تتہ پانی کے نواحی علاقے تاہی پونچھ کے قدیمی قبرستان میں نامعلوم شرپسندوں نے رات کی تاریکی میں متعدد قبروں کو اُکھاڑ دیااوران قبروں کی بے حرمتی کی، اہل علاقہ میں شدید تشویش اور غم وغصہ،مختلف چہ مگوئیاں، اطلاع ملتے ہی پولیس بھی پہنچ آئی،
مقامی لوگوں سے معلومات لیں اور مزید تفتیش شروع کردی،تفصیلات کے مطابق تتہ پانی کے نواحی علاقے تاہی پونچھ میں دریائے پونچھ کے کنارے موجود قدیمی قبرستان میں گزشتہ شب نامعلوم شرپسندوں نے رات کی تاریکی میں متعدد قبروں کو اُکھاڑ دیااور ان قبروں کی بے حرمتی کی گئی،اس واقعہ کے بعد اہل علاقہ میں شدید تشویش اور غم وغصہ پایا جاتاہے، واقعہ کی اطلاع ملتے ہی چوکی آفیسر پویس چوکی سہڑہ ملک محمد اشفاق ہمراہ نفری موقع پر پہنچے اور انہوں نے مقامی لوگوں سے معلومات لیں اور مزید تفتیش شروع کردی ہے،مقامی لوگوں کے مطابق مذکورہ قبرستان میں مدفون افراد کے بارے میں اپنے بزرگوں سے سنتے رہے کہ وہ یہاں کے باسی نہیں تھے بلکہ دوسرے علاقوں سے تجارت کی غرض سے آئے تھے،کسی وبائی مرض کا شکارہوکر انتقال کر گئے تھے اور یہاں اکھٹے دفن کردئیے گئے تھے، شاہد شرپسندوں نے اس شک کی بناء پر یہ قبریں کھودی ہیں کہ یہاں انکی نایاب وقیمتی چیزیں دفن ہیں، مختلف چہ مگوئیاں ہورہی ہیں، اہل علاقہ نے مطالبہ کیا ہے کہ اس گھناونے فعل میں ملوث افراد کا سراغ لگایا جائے اور ان کیخلاف سخت کاروائی کی جائے۔
