لاہور(این این آئی) مسلم لیگ (ن) پنجاب کی سیکرٹری اطلاعات عظمی بخاری نے کہا ہے کہ بزدار صاحب آپ کی کارکردگی نے عوام کے ساتھ آپ کے اتحادیوں کو بھی مایوس کیا ہے،وسیم اکرم پلس اور شیر شاہ سوری پارٹ ٹو پنجاب کے عوام کیلئے پرانے ماڈل کی سوزوکی موٹرسائیکل ثابت ہوئے ہیں۔ اپنے بیان میں انہوں نے کہا کہ بنی گالہ کے تعویز گنڈے بھی بزدار صاحب کیلئے مزید کارآمد ثابت نہیں ہورہے،جادو ٹونے سے حکومتیں نہیں جعلی پیر خانے ہی چل سکتے ہیں،عوام روٹی مانگ رہے ہیں
اور حکمران کہتے ہیں ہمارے پاس پیسے نہیں ہیں،عمران خان اور عثمان بزدار ایک ہی سکے کے دو رخ ثابت ہوئے ہیں۔عظمی بخاری نے کہا کہ حکومتی اتحادیوں کو اپنے سیاسی مستقبل کا جلد فیصلہ کرنا ہو گا،اتحادی جماعتیں جتنا زیادہ وقت ضائع کریں گی ان نااہل حکمرانوں کے ہاتھوں اتنی ملک کی بردبادی ہو گی۔ا نہوں نے کہا کہ تبدیلی کا مزہ قوم نے چکھ لیا ہے اب وسط مدتی انتخابات کے سوا دوسرا کوئی حل نہیں رہا،عمران خان بلی چوہے کا کھیل کھیلنا بند کریں اور گھر جائیں۔
